რეჟისორ ნანა ექვთიმიშვილის ფილმი ჩემი ბედნიერი ოჯახი სანდენსის კინოფესტივალის მთავარ საკონკურსო პროგრამაში მოხვდა. ფილმის მსოფლიო პრემიერა იანვარში გაიმართება ამერიკაში.

ფილმ გრძელი ნათელი დღეების შემდეგ, რომელიც ასზე მეტ კინოფესტივალზე აჩვენეს, მსოფლიოს რამდენიმე ქვეყნის კინოგაქირავებაში მოხვდა და 2013 წლის ყველაზე წარმატებულ საფესტივალო ფილმადაც დასახელდა, ჩემი ბედნიერი ოჯახი ნანა ექვთიმიშვილისა და სიმონ გროსისთვის მეორე ერთობლივი ფილმია.

სიუჟეტი თბილისური ოჯახის გარშემო ვითარდება, სადაც სამი თაობის წარმომადგენლები ერთ ჭერქვეშ ცხოვრობენ. ხშირად ამბობენ, რომ ნანა ექვთიმიშვილის ფილმების ერთ-ერთი მთავარი შტრიხი მის მიერ შექმნილი ქალი პერსონაჟებია. მოვლენების ცენტრში ქართული ენისა და ლიტერატურის პედაგოგი მანანა მხეიძეა, რომელიც ერთ დღეს საკუთარი ცხოვრების შეცვლას მოინდომებს. ჩემი ბედნიერი ოჯახი საქართველოს, გერმანიისა და საფრანგეთის ერთობლივი კინოპროდუქციაა, რომელიც საქართველოს კინემატოგრაფიის ეროვნული ცენტრისა და კინემატოგრაფიის ევროპული ფონდის ევრიმაჟის ხელშეწყობით შეიქმნა. ფილმის გადაღებაში საკუთარი წვლილი შეიტანა კინოინდუსტრიის წახალისების სახელმწიფო პროგრამამ "გადაიღე საქართველოში".

ფილმში მთავარ როლებს ია შუღლიაშვილი, მერაბ ნინიძე და ბერტა ხაფავა ასრულებენ.
ფილმის პრემიერა ქართველი და საერთაშორისო მაყურებლისთვის 2017 წელს შედგება.