ქართული ოცნების ერთ-ერთი ლიდერის, გიორგი ვოლსკის თქმით, 20 ივნისის წლისთავზე ექსპრეზიდენტ მარგველაშვილი განცხადება "მდარე და უზნეო" ტყუილი იყო. ეს შეფასება ვოლსკიმ მარგველაშვილის სავარაუდო მომავალ პოლიტიკურ კარიერაზე საუბრისას გააკეთა და აღნიშნა, რომ პოლიტიკოსი სამართლიანი შეფასების გარეშე ვერ ივარგებს. დეპუტატი საუბრობს იმ განცხადებაზე, სადაც მარგველაშვილმა თქვა, რომ "ხელისუფლება, რომელიც პატრიოტული ლოზუნგებით გამოსულ მოქალაქეებს ტყვიას ესვრის, არ არის დემოკრატი".

"არ ვიცი რამდენი ამომრჩეველი ეყოლება, ყოველ შემთხვევაში, გუშინ ვუსმინე და ძალიან მდარე და უზნეო ტყუილი თქვა იმის თაობაზე, რომ არაფერი არ ხდებოდა 20 ივნისს და სახელმწიფომ იძალადა თავის მოქალაქეებზე. ასეთი ცალმხრივი შეფასების გარდა, კიდევ დამოკიდებულება გამოხატა თავისი, ეტყობა, როგორც მომავალი პოლიტიკური ფიგურისა საერთოდ პოლიტიკური პროცესების მიმართ. სამართლიანი შეფასების გარეშე ვერც ერთი პოლიტიკოსი ვერ ივარგებს, არც მარგველაშვილია გამონაკლისი", — თქვა ვოლსკიმ.

საქართველოს ყოფილი პრეზიდენტი, გიორგი მარგველაშვილი მიიჩნევს, რომ ასეთი ხელისუფლება ჩვენს ერს და საზოგადოებას "არ ეკადრება". რუსთაველის გამზირზე მიმდინარე აქციაზე სიტყვით გამოსვლისას, მან ჩამოთვალა, კონკრეტულად რას გულისხმობს ამაში.

"ხელისუფლება, რომელიც პატრიოტული ლოზუნგებით გამოსულ მოქალაქეებს ტყვიას ესვრის, არ არის დემოკრატი; ხელისუფლება, რომელიც მერე პატრიოტული ლოზუნგებით გამოსულ მოქალაქეებს წყლის ჭავლით არბევს, არ არის დემოკრატიული; ხელისუფლება, რომელიც პოლიტპატიმრებს დაუშვებს თავის ქვეყანაში, არის ავტორიტარი; ხელისუფლება, რომელი საკუთარ ერს და საერთაშორისო პარტნიორებს მისცემს დაპირებას და მოიტყუება, არის საერთაშორისო თაღლითი. ასეთი ხელისუფლება არ ეკადრება ჩვენს ერს და ჩვენს საზოგადოებას", — თქვა ექსპრეზიდენტმა.