რუსუდან გლურჯიძის ფილმმა "სხვისი სახლი" საბერძნეთის კინოფესტივალის მთავარი ჯილდო აიღო. Panorama of European Cinema-ზე არაერთი ცნობილი და წარმატებული ფილმი იყო ნაჩვენები მსოფლიოს სხვადასხვა ქვეყნიდან.

კინოფესტივალის მთავარ ჯილდო "ფიპრესს" კინოკრიტიკოსთა საერთაშორისო ფედერაციის წევრებისგან დაკომპლექტებული ჟიური გასცემს.

"სხვისი სახლი", რომელმაც უკვე არაერთი საერთაშორისო ჯილდო მოიპოვა, საქართველოს კანდიდატია ოსკარზეც. ამ ნამუშევარმა უკვე მოიპოვა მთავარი პრიზები კარლოვი ვარის, ბერგენისა და ევრაზიის საერთაშორისო ფესტივალებზე.

რამდენიმე საათის წინ "სხვისი სახლი", როგორც საუკეთესო სადებიუტო ნამუშევარი, პრესის საერთაშორისო აკადემიის პრესტიჟული პრიზის, "სატელიტის" მფლობელი გახდა.

რუსუდან გლურჯიძის ფილმის ქართული პრემიერა 2 დეკემბერს, 19:00 საათზე კინოთეატრ "ამირანში" თბილისის მე-17 საერთაშორისო კინოფესტივალზე შედგება.