იუსტიციის მინისტრ თეა წულუკიანის განცხადებით, არის საკმაოდ საგანგაშო ნიშნების იმისა, რომ შეზღუდვების შემსუბუქებამ კორონავირუსის ახალი წყაროები გააჩინა. მისივე თქმით, ის ადამიანები, ვისი ინფიცირების წყაროც უცნობია, სხვადასხვა ასაკის არიან.

"არის საკმაოდ საგანგაშო პირველი ნიშნები იმისა, რომ შემსუბუქებულმა ღონისძიებებმა კორონავირუსთან დაკავშირებით გააჩინა თბილისში, დედაქალაქში ვირუსის გადადების წყაროები, რომელთა მოძებნაც ჯერჯერობით ვერ ხერხდება. შესაბამისად, ის რამდენიმე ადამიანი, რომელსაც დაუდასტურდა ბოლო რამდენიმე საათში კორონავირუსი, პირველი, რაც შეგვიძლია ვთქვათ, ისინი არიან აბსოლუტურად სხვადასხვა თაობის წარმომადგენლები, 25, 30, 70 წლის ზევითაც ასაკის და არაერთი მათგანის შემთხვევაში ვერ დგინდება, ვისგან გადაედოთ ვირუსი", — თქვა მან მთავრობის სხდომის შემდეგ.

იუსტიციის მინისტრის განცხადებით, ეს არის საგანგაშო. მან მოსახლეობას მოუწოდა დაიცვან რეკომენდაციები, რომლებსაც ჯანდაცვის სფეროს სპეციალისტები იძლევიან.

თეა წულუკიანის ინფორმაციით, ციხეებში ხანმოკლე პაემნები, ამანათები და სხვა გზავნილები გაგრძელდება, მაგრამ "პენიტენციური სამსახურის გამოიჩენს სიმკაცრეს, რომ საპატიმრო დარჩეს ვირუსის მიღმა".

ბოლო 24 საათში კორონავირუსის 6 ახალი შემთხვევა გამოვლინდა, ხოლო 4 ადამიანი გამოჯანმრთელდა. მათგან 1 საკარანტინო სივრციდანაა, ხოლო 1 სამედიცინო პერსონალია. 4-ის წყარო უცნობია.

სულ შემთხვევები 828-მდე გაიზარდა, გამოჯანმრთელებულების რიცხვი 694 გახდა. გარდაცვლილია 13 ადამიანი. კარანტინის რეჟიმში 3 230 ადამიანი რჩება, ხოლო სტაციონარში მეთვალყურეობის ქვეშ — 285.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: