ჯეს უოტერსი, რომელიც ბოლო წლების ერთ-ერთი ყველაზე პოპულარული სატელევიზიო შოუ This Is Us-ის შექმნაზე მუშაობდა, 39 წლის ასაკში გარდაიცვალა.

ამის შესახებ ინფორმაცია სერიალის სცენარისტებმა ტვიტერის ოფიციალურ ანგარიშზე გაავრცელეს:

"ჯეს უოტერსის გარდაცვალების გამო მთელი შემოქმედებითი გუნდი განადგურებულია. ერთად მუშაობისას ჯესმა როგორც ჩვენ ყველაზე, ისე შოუზე წარუშლელი კვალი დატოვა. მას ბრწყინვალედ გამოსდიოდა ამბების თხრობა და საოცრად ენერგიული იყო. თანავუგრძნობთ მის საყვარელ ადამიანებს. ის ერთ-ერთი ჩვენგანი იყო", — წერია განცხადებაში.

IMDB-ის მიხედვით, ჯეს უოტერსმა ტელეკომპანია NBC-ის ერთ-ერთი ყველაზე ცნობილი სერიალის This Is Us თვრამეტი ეპიზოდის სცენარზე იმუშავა. არც ისე დიდხნიანი კარიერის განმავლობაში, ის ასევე მონაწილეობას იღებდა წელს გამოსული ჯიმ ქერის ახალი კომედიური სერიალის Kidding შექმნაში.

ამ სამწუხარო ფაქტს გამოეხმაურა This Is Us-ის შემქმნელი, დენ ფოგელმენიც, რომელიც აღნიშნავს, რომ ჯეს უოტერსი შთამბეჭდავი ხელოვანი იყო და "მთელ სერიალზე მან წარუშლელი კვალი დატოვა, ამ სამწუხარო ამბავმა კი ყველას გული ატკინა".

This Is Us რომანტიკული საოჯახო დრამაა, რომლის პრემიერაც 2016 წელს შედგა და მაყურებლების მოწონებასთან ერთად, სატელევიზიო სივრცეში ყველა გავლენიანი დაჯილდოების ნომინაციებიც მალევე მოიპოვა.

სერიალის ჯერჯერობით ბოლო, მეოთხე სეზონი ამ წლის მარტში დასრულდა, თუმცა დაგეგმილია კიდევ რამდენიმე სეზონის გადაღება.