პრემიერმინისტრის, გიორგი გახარიას განცხადებით, ჯანდაცვის სამინისტრო სომხეთის დახმარებაზე მუშაობს. მისი თქმით, მეზობელ ქვეყანას მედპერსონალით დაეხმარებიან.

"ვერცერთი ქვეყანა ვერ გაუმკლავდება ამ კრიზისს მარტო, ამიტომ ჩვენ გვმართებს ურთიერთთანადგომა. [...] ჯანდაცვის სამინისტროს აქვს უკვე დავალება მიღებული, რომ მოამზადოს ის დახმარება, რომელიც საქართველოს შეუძლია გაუწიოს სომხეთს", — განაცხადა მან მთავრობის სხდომაზე.

გახარიას თქმით, სომხეთში კოლეგებთან ყოველდღიურ კონტაქტზე არიან თვითონ, ჯანდაცვის, ეკონომიკისა და საგარეო საქმეთა მინისტრები.

სომხეთში რთული ეპიდსიტუაციაა. პრემიერმინისტრის, ნიკოლ ფაშინიანის განცხადებით, ასეულობით პაციენტი ელოდება ჰოსპიტალიზაციას, მაგრამ მათ ადგილები არ აქვთ. მისივე თქმით, ორი პაციენტი გარდაიცვალა იმის გამო, რომ რეანიმაციაშიც არ იყო შესაბამისი ადგილები.