თბილისის მერი, კახა კალაძე აცხადებს, რომ პარლამენტის წინ ტერიტორიის რეაბილიტაცია ივლისის ბოლოს დასრულდება და ამაზე "სრულ პასუხისმგებლობას იღებს". ამაზე მერმა დღეს, 10 ივნისს ჟურნალისტებთან ისაუბრა:

"პროექტი ხორციელდება. პრობლემები იყო პანდემიის დროს, ყველა ინფრასტრუქტურულ პროექტზე იმ ტემპით ვერ გრძელდებოდა მუშაობა, როგორც დაგეგმილი იყო. ახლა, სრული პასუხისმგებლობით ვამბობ, რომ სამუშაოები მიმდინარეობს მაქსიმალური ტემპით და ივლისის ბოლოს მთლიანად იქნება დასრულებული და განახლებული".

სარეაბილიტაციო სამუშაოების ირგვლივ დადგმულ მწვანე ღობეზე აქტივისტების მიერ გაკეთებული საპროტესტო წარწერებია. "სირცხვილია", "ბიძინას ბოსტანი", "გადადექი" და სხვა ფრაზები მას შემდეგ დააწერეს მასზე, რაც მერიამ მალხაზ მაჩალიკაშვილის კარავი აიღო, ჯერ იქ საახალწლო ატრაქციონები მოაწყო, მერე კი ტერიტორიის რეაბილიტაცია დაიწყო. საახალწლო ატრაქციონები 2019 წლის 31 დეკემბერს აქტივისტებთან დაპირისპირებისა და დაკავებების ფონზე დაიდგა.