საქართველოს პროკურატურის განცხადებით, კრიმინალური ავტორიტეტის მინდია ლავასოღლის ექსტრადირებასთან დაკავშირებით ოჯახის წევრებს დღეს, 8 ივნისს შეხვდებიან.

"საქართველოს პროკურატურის შუამდგომლობის საფუძველზე თურქეთის რესპუბლიკის კომპეტენტური ორგანოები განიხილავენ ძებნილი მინდია ლავასოღლის საქართველოში ექსტრადიციას. მოცემულ ეტაპზე მიმდინარეობს შესაბამისი საერთაშორისო ხელშეკრულებებით გათვალისწინებული საექსტრადიციო პროცედურები", — ნათქვამია უწყების განცხადებაში.

ლავასოღლის ექსტრადირების მოთხოვნით ბათუმში აქციები დაახლოებით ერთი კვირის განმავლობაში იმართებოდა. ოჯახის წევრები აცხადებენ, რომ პროტესტს არ შეწყვეტენ, სანამ ექსტრადირების ზუსტი თარიღები არ ეცოდინებათ.

თურქმა სამართალდამცველებმა ლავასოღლი მიმდინარე წლის ოქტომბერში, ტრაბზონში დააკავეს. მას ბრალი ედება სისხლის სამართლის კოდექსის 223-ე პრიმა მუხლის 2 ნაწილით, რაც გულისხმობს კანონიერ ქურდობას. ქუთაისის სასამართლომ მას დაუსწრებლად მიუსაჯა თავისუფლების აღკვეთა 12 წლის ვადით.

ადვოკატის ინფორმაციით, დაპატიმრების ვადა ლავასოღლის თურქეთში 28 თებერვალს ამოიწურა და ის საქართველოში უნდა გადმოეყვანათ. მისივე განმარტებით, ლავას ოღლი 28 თებერვალს გაათავისუფლეს და სადეპორტო სივრცეში გადაიყვანეს, საიდანაც საქართველოს ხელისუფლებას უნდა წაეყვანა, თუმცა 29 თებერვალს ის ისევ დააპატიმრეს და ციხეში დააბრუნეს.

შინაგან საქმეთა სამინისტროს ინფორმაციით, აქციაზე 9 პირი დააკავეს. მათ ბრალი ადმინისტრაციულ სამართალდარღვევათა კოდექსის 173-ე მუხლით აქვთ წარდგენილი, რაც სამართალდამცავის დაუმორჩილებლობას გულისხმობს. დანაშაული იწვევს დაჯარიმებას 1 000 ლარიდან 4 000 ლარამდე ოდენობით ან ადმინისტრაციულ პატიმრობას 15 დღემდე ვადით.