საქართველოს პრემიერ მინისტრმა, გიორგი კვირიკაშვილმა ტელეკომპანია Sky News-ის ეთერში, გადაცემა Ian King Live-ში განაცხადა, რომ კორუფციის დაბალი მაჩვენებლით საქართველო პირველ ადგილზეა აღმოსავლეთ ევროპისა და ცენტრალური აზიის 13 ქვეყანას შორის.

კვირიკაშვილმა აღნიშნა, რომ სხვადასხვა წამყვანი ორგანიზაციის ანგარიშის თანახმად, კორუფციის დაბალი მაჩვენებლით საქართველო მსოფლიოს 102 ქვეყანას შორის 29-ე ადგილზეა. მან ასევე განმარტა, რომ გლობალური კორუფციის გამოკითხვის ბარომეტრის მიხედვით, საქართველოში გამოკითხულთა 4%-ზე ნაკლები აცხადებს, რომ იდესმე ქრთამი მიუცია.

კვირიკაშვილმა იმაზეც ისაუბრა, თუ როგორ და რა მეთოდებით ებრძვის საქართველო კორუფციას:

"მე, როგორც საქართველის პრემიერ მინისტრი, სიამაყით ვაცხადებ რომ ბოლო წლების განმავლობაში საქართველომ ბევრს მიაღწია კორუფციასთან ბრძოლაში. ჩვენ ამისთვის რიგი ინოვაციები დავნერგეთ. მაგალითად, ჩვენ ვაფართოვებთ ერთი ფანჯრის პრინციპით მომუშავე მომსახურებას ფიზიკური პირებისთვის. ასე რომ, ერთ შენობაში ერთი ფანჯრის სერვისით ჩვენ გავუწევთ მომსახურებას, როგორც ფიზიკურ, ისე იურიდიულ პირებს. ასევე დავნერგეთ ელექტრონული შესყიდვებისა და ელექტრონული ბიუჯეტირების სისტემაც, რომელიც კორუფციის შესაძლებლობას გამორიცხავს".

ჟურნალისტმა კვირიკაშვილს იმ ქართველი კრიმინალებისგან მომდინარე საფრთხის მნიშვნელობაზეც დაუსვა შეკითხვა, რომელებიც თუნდაც გერმანიაში ცხოვრობენ, არიან ჩართულნი კრიმინალურ დაჯგუფებებში და ბინებს ძარცვავენ. პრემიერმა კი უპასუხა, რომ აღნიშნული მოძველებული შეხედულებაა, რადგან საქართველოდან პოლიციის ატაშეები ევროკავშირის ყველა ქვეყანაში არიან დანიშნული, რამაც უკვე დიდი შედეგი გამოიღო.