ვისკონსინის შტატის საარჩევნო კომისიამ, ამერიკის საპრეზიდენტო არჩევნებიდან 2 კვირის შემდეგ, ხმების ხელახალი დათვლის მოთხოვნა მიიღო. ამ შტატში რესპუბლიკელმა დონალდ ტრამპმა დემოკრატ ჰილარი კლინტონს მცირედით მოუგო.

BBC-ის ინფორმაციით, კომისიაში მოთხოვნა მწვანეთა პარტიის საპრეზიდენტო კანდიდატმა ჯილ სტეინმა შეიტანა.

ჯილ სტეინი ასევე აპირებს ხმების ხელმეორედ დათვლა მიჩიგანისა და პენსილვანიის შტატებში მოითხოვოს.

თუ ხმათა თავიდან დათვლის შემდეგ ჰილარი კლინტონი ვისკონსინში მოიგებს, ის მხოლოდ ამ შტატის განახლებული შედეგით მაინც ვერ დაეწევა ტრამპს, თუმცა საარჩევნო კოლეგიაში 10 ხმით უპირატესობა ექნება.

ტვიტერზე ვისკონსინის შტატის კომისიამ დაადასტურა ხმების ხელახლა დათვლის პეტიციის მიღება და განაცხადა, რომ დეტალებს მალე გამოაქვეყნებენ.

ჯილ სტეინის თქმით, ხმათა განმეორებითი დათვლის პროცესი მომავალ კვირაში დაიწყება. მოთხოვნის შეტანის ბოლო ვადა პარასკევი იყო. ამერიკელებმა პროცესების დასაფინანსებლად სტეინს 5 მილიონ ამერიკულ დოლარზე მეტი შეუგროვეს.

საარჩევნო უფლებების იურისტები კანდიდატებს მოუწოდებდნენ, მოეთხოვათ ხმების თავიდან დათვლა, რადგან საბოლოო შედეგები წინასწარი შედეგებისაგან მკვეთრად განსხვავდებოდა სამ შტატში - ვისკონსინში, მიჩიგანსა და პენსილვანიაში.

რამდენიმე დღის წინ, კომპიუტერული მეცნიერებების მკვლევარებმა განაცხადეს, რომ შესაძლოა რამდენიმე შტატში რუსეთიდან შესაძლო კიბერ თავდასხმის საშუალებით არჩევნები გაყალბდა და საბოლოო შედეგების ცვლილება ამან გამოიწვია. შეგახსენებთ, რომ ამერიკაში ხმებს ელექტრონულად ითვლიან. დამოუკიდებელმა მკვლევარებმა დღეს ასევე განაცხადეს, რომ, საპრეზიდენტო არჩევნების დროს, ამერიკაში რუსული პროპაგანდა მოქმედებდა.

პენსილვანიაში ხმების დათვლის მოთხოვნის შეტანის დედლაინი ორშაბათია, მიჩიგანში - ოთხშაბათი.

რესპუბლიკელი ტრამპის საპრეზიდენტო ადმინისტრაციას, რომელმაც სამივე შტატში სულ მცირედით მოუგო კლინტონს, ჯერჯერობით კომენტარი არ გაუკეთებია.

ჰილარი კლინტონის მიერ მოპოვებულმა ხალხის ხმებმა, ტრამპის ხმებს 2,1 მილიონით გადაასწრო. წაიკითხეთ ჩვენი სტატია, რატომ გახდა ტრამპი პრეზიდენტი, როცა კლინტონს მეტი ხმა აქვს.