ევროპული საქართველოს ერთ-ერთი ლიდერის, დავით ბაქრაძის განცხადებით, ვერ მიხვდა, რა იგულისხმა ქვეყნის პრეზიდენტმა, როცა თქვა, რომ ყველა, ვინც კორონავირუსის პანდემიის დროს ექიმების მიმართ უნდობლობას აჩენს და აუცილებელი ზომებს ეჭვქვეშ აყენებს, ქვეყნის წარმატებას და გადარჩენას ებრძვის.

"ვერ გეტყვით ნამდვილად, რთულად გასაგები განცხადებაა. ქალბატონი ზურაბიშვილის გაგება მაშინაც რთულია, როცა მას სურს ნათლად და გასაგებად ისაუბროს და როცა ის გამოცანებით საუბრობს, მით უმეტეს ძალიან რთულია გავუგოთ რა დგას მისი განცხადების უკან. ექიმებს კიდევ ერთხელ ვუდასტურებ ჩემს ღრმა პატივისცემას, კიდევ ერთხელ ვადასტურებ შეურიგებელი ბრძოლის აუცილებლობას კორონავირუსის მიმართ, ხოლო ქალბატონი ზურაბიშვილის განმარტებას ამ შემთხვევაში მაინც ნუ მომთხოვთ, რადგან ვერ მივხვდი რა იგულისხმა", — უთხრა დავით ბაქრაძემ ჟურნალისტებს.

საქართველოს პრეზიდენტმა ექიმების შესახებ განცხადება ვაზიანში, დამოუკიდებლობის დღისადმი მიძღვნილ ღონისძიებაზე სიტყვით გამოსვლის დროს გააკეთა. სალომე ზურაბიშვილმა თქვა, რომ კორონავირუსის პანდემიის მსგავსი მასშტაბის კრიზისების დროს აუცილებელია გარკვეული დონის პოლიტიკური კონსოლიდაცია. მან ოპოზიციის ნაწილი გააკრიტიკა და აღნიშნა, რომ ყველა, ვინც კორონავირუსის პანდემიის დროს ექიმების მიმართ უნდობლობას აჩენს და აუცილებელი ზომებს ეჭვქვეშ აყენებს, ქვეყნის წარმატებას და გადარჩენას ებრძვის..