აუდიტორია 115-ის წევრები შეიკრიბნენ უნივერსიტეტის ფოიეში, მათ წაიკითხეს მანიფესტი და მიმართეს საქართველოს პრემიერმინისტრს, რის შემდეგაც, სტუდენტების ნაწილი პირველი კორპუსის მეორე სართულზე, ნაწილი კი მესამე სართულზე გადავიდა.

აუდიტორია 115-ის სტუდენტები ცდილობენ საარჩევნო უბნებში შეღწევას, მაგრამ უბნის კარი დაკეტილი ხვდებათ. ისინი პროცესის ჩაშლას ცდილობენ.

მოძრაობის წევრები ამბობენ, რომ ისინი დასხდებიან ყველა საარჩევნო უბანთან და მცდელობას არ შეწყვეტენ.

თსუ-ს საარჩევნო კომისიის თავჯდომარე დემეტრე ეგნატაშვილის თქმით, პირველ კორპუსში განთავსებულ საარჩევნო უბნები "ხმაურის გამო" დროებით დაიკეტა.

თბილისის სახელმწიფო უნივერსიტეტში გამართულ სტუდენტური თვითმმართველობის არჩევნებს აუდიტორია 115 აპროტესტებს.

"თვითმმართველობის არჩევნები ძველი მეთოდებით ტარდება. მიგვაჩნია, რომ სტუდენტური თვითმმართველობის ამ ფორმით შენარჩუნება წარმოადგენს ავტორიტარული რეჟიმის გადმონაშთს უნივერსიტეტში" - აცხადებენ ისინი.