უკრაინაში საქართველოს ელჩი თეიმურაზ შარაშენიძე, რომელიც კონსულტაციისთვის გამოიძახეს, ორკვირიანი კარანტინის შემდეგ საგარეო საქმეთა სამინისტროში ორშაბათს მივა. ამის შესახებ საგარეო საქმეთა მინისტრმა, დავით ზალკალიანმა განაცხადა.

მისი თქმით, უკრაინასთან სტრატეგიული პარტნიორობის გადახედვა არ იგეგმება, თუმცა ორმხრივ ურთიერთობებში სერიოზული პრობლემები შეიქმნა და სერიოზული ანალიზი სჭირდებათ, თუ როგორ უნდა გაგრძელდეს ორმხრივი ურთიერთობა.

"ის იყო კარანტინში ორი კვირა. ორშაბათს მოვა სამინისტროში და ჩვენ გავივლით ყველა დეტალს ყველა იმ ძირითად საკითხზე, რაც არის დაკავშირებული არსებულ სიტუაციასთან და ჩვენს სტრატეგიულ პარტნიორთან მომავალ ურთიერთობებთან. მიუხედავად ამ პრობლემისა, ჩვენ ვაგრძლებთ უკრაინასთან პარტნიორობას და ეს გადახედვას არ ექვემდებარება", — განაცხადა ზალკალიანმა.

ელჩი კონსულტაციებისთვის მას შემდეგ გამოიძახეს, რაც უკრაინის რეფორმების აღმასრულებელი კომიტეტის თავმჯდომარის თანამდებობაზე მიხეილ სააკაშვილის დანიშნეს.

22 აპრილს მიხეილ სააკაშვილმა განაცხადა, რომ უკრაინის პრეზიდენტმა ვოლოდიმირ ზელენსკიმ მას რეფორმების საკითხებში ვიცე-პრემიერის პოსტი შესთავაზა. ეს საკითხი ქართული ოცნებისთვის უკრაინასთან დიპლომატიური ურთიერთობის გადახედვის საბაბი გახდა. მთავრობისა და პარლამენტში მმართველი გუნდის ლიდერებმა უკრაინელ კოლეგებს უთხრეს, რომ ეს მათ შორის ნდობას შეარყევდა და კატეგორიულად მიუღებელი იყო. ერთი კვირის შემდეგ კი რადაში ხალხის მსახურის ფრაქციის ლიდერმა, დავიდ არახამიამ განაცხადა, რომ სააკაშვილისთვის მუშაობის ახალი ფორმატი იპოვეს.

რეფორმების ეროვნული საბჭო 2014 წელს მაშინდელი პრეზიდენტის, პეტრო პოროშენკოს ბრძანებით შეიქმნა. საბჭოს წევრებს პერსონალურად უკრაინის პრეზიდენტი ნიშნავს. დოიჩე ველეს ინფორმაციით, 2014-2018 წლებში საბჭომ სულ 28 სხდომა ჩაატარა. ბოლო სხდომა კი 2018 წლის მარტში გაიმართა.