საქართველოს პარლამენტის წევრი ევროპული საქართველოდან, სერგო რატიანი მიიჩნევს, რომ ნებისმიერი შეზღუდვა, რომლის დაწესებაც მთავრობას სურს, ცალკე უნდა შევიდეს პარლამენტში და ცალკე განიხილონ.

ამის შესახებ რატიანმა ქართული ოცნების მიერ დაგეგმილ ცვლილებებზე საუბრისას განაცხადა, რომლის მიხედვით, შესაძლებელი იქნება შეზღუდვები დაწესდეს საგანგებო მდგომარეობის გამოცხადების გარეშეც.

"არათუ ქართული ოცნების, არამედ დემოკრატიულ სამყაროში ნებისმიერი მთავრობისთვის ამ უფლებების მინიჭება არის სრულიად დაუშვებელი და შემაშფოთებელიც კი, როცა მთავრობა ამას ითხოვს. ბუნებრივია, ქართული ოცნების მთავრობის პირობებში კიდევ უფრო მძიმეა ეს ვითარება რადგან ჩვენ ვხედავთ გარკვეულ სურვილებს და მიდრეკილებებს ავტორიტარიზმისკენ. შესაბამისად, ნებისმიერი შეზღუდვა, რომელიც მთავრობას მიაჩნია, რომ უნდა იყოს დაწესებული, უნდა შემოვიდეს პარლამენტში და მოითხოვოს კონკრეტული უფლების მიცემა", — ამბობს რატიანი.

პარლამენტში ინიცირებული კანონპროექტის მიხედვით, ხელისუფლებას გარკვეული უფლებები საგანგებო მდგომარეობის გამოცხადების გარეშე ეძლევა. მათ შორისაა მიმოსვლის, საკუთრების, სოციალური ღონისძიების მიზნით თავშეყრის შეზღუდვის შესაძლებლობაც.