პარლამენტის ვიცე-სპიკერი, კახა კუჭავა ევროპარლამენტში საქართველოს ასოცირებასთან დაკავშირებით ანგარიშის განხილვას გამოეხმაურა და თქვა, რომ ტერმინი პოლიტპატიმარი ერთმა ევროპარლამენტრამა ახსენა.

მისივე თქმით, ამაზეც ამ ევროპარლამენტრს მისმა კოლეგამ პასუხი გასცა.

"ერთი ევროპარლამენტარის მიერ ნახსენები იქნა ტერმინი პოლიტპატიმარი, თუმცა, აქვე თუ გავითვალისწინებთ სხვა ევროპარლამენტარების კომენტარებსაც, ფაქტობრივად, პასუხი გაეცა ამ გამონათქვამებს. საუბარია, მარინა კალიურანდის კომენტარზე, რომელმაც მოუწოდა თავის კოლეგებს, რომ თავი შეიკავონ ფეიკნიუსების გავრცელებისგან სოციალური ქსელებით, განსაკუთრებით ტვიტერზე მიუთითებდა და უფრო კონსტრუქციული დიალოგისკენ და საუბრისკენ მოუწოდა ყველას", — განაცხადა კუჭავამ.

კუჭავას თქმით, საბოლოო ჯამში, ეს ანგარიში პოზიტიურად იქნა შეფასებული.

"ადრე კრიტიკულად განწყობილიბევრი ევროპარლამენტარიც კი ხაზს უსვამდა და აღნიშნავდა იმ პროგრესს, რომელსაც საქართველომ მიაღწია ასოცირების ხელშეკრულების ვალდებულებების შესრულების კუთხით და იმედოვნებენ, რომ 2020 წლის საპარლამენტო არჩევნები ჩატარდება დამოუკიდებელ, თავისუფალ და გამჭვირვალე გარემოში, რასაც ჩვენ დიდი ხანია ვამბობთ. ბოლოს ჩატარებული არჩევნებითაც დავამტკიცეთ, რომ ამის უზურნველყოფა ჩვენს ხელისუფლებას შეუძლია", — განაცხადა კუჭავამ.

ევროკავშირი-საქართველოს ასოცირების საპარლამენტო კომიტეტის თანათავმჯდომარემ, მარინა კალიურანდმა კოლეგებს მოუწოდა, მაღალი პასუხისმგებლობა გამოიჩინონ და ყველა განცხადება გადამოწმებულ ფაქტებზე დაყრდნობით გააკეთონ.