გიორგი რურუას სასამართლო განხილვა 20 მაისს 10 საათისთვის გადაიდო. დღევანდელ სხდომაზე, სადაც ბრალდებულისთვის აღკვეთის გაუქმების შუამდგომლობა არ დაკმაყოფილდა, ერთ მოწმეს 4,5 საათის განმვლობაში კითხავდნენ.

"თუკი სასამართლოს არ ექნება მითითება, რა გააკეთოს, ესეც კი საკმარისია იმისთვის რომ სასამართლომ დაუყოვნებლივ გაათავისუფლოს. ჩვენ თითქმის ყველა სხდომაზე ვაყენებთ რურუას გათავისუფლების მოთხოვნას და მომავალშიც ყველა შესაძლებლობას გამოვიყენებთ", — ამბობს რურუას ადვოკატი, დიმიტრი საძაგლიშვილი

საძაგლიშვილმა ასევე აღნიშნა, რომ ბრალდებულის გათავისუფლების შესახებ შუამდგომლობის არდაკმაყოფილება უკანონო გადაწყვეტილება იყო. ადვოკატმა ისაუბრა სხდომაზე დაკითხული პატრულის თანამშრომლის ჩვენებაზე. საძაგლიშვილის თქმით, პოლიციელმა დაადასტურა, რომ რურუას დაკავებისას სამხრე კამერა არ ეკეთა.

"დღევანდელ პროცესზე კიდევ ერთხელ გამოიკვეთა ბრალდების პოზიციის აბსურდულობა. უხერხულ მდგომარეობაში ჩააგდეს პატრულის თანამშრომელი, რომელმაც თქვა, რომ თითქოს ვინმე დავით დვალიშვილმა დაურეკა, რომელსაც იცნობს, თუმცა არ შეუძლია ფიზიკურად აღწეროს, მათ შორის არ იცის მაღალია თუ დაბალია, მსუქანია თუ გამხდარი. ეს ადამიანი მას არ იცნობს და ათქმევინეს, თითქოს ვინმე დვალიშვილმა სთხოვა ავტომობილის გაჩერება.

ყველაზე მნიშვნელოვანი გარემოება რაც პატრულის თანამშრომელმა განაცხადა, იყოს ის რომ მას ხელმძღვანელმა უთხრა, არ გაეკეთებინა სამხრე კამერა. ანუ განზრახ არ გააკეთებინა, რათა არ დაფიქსირებულიყო გიორგი რურუას დაკავება", — თქვა საძაგლიშვილმა.

საქმის პროკურორი, ვასილ სამხარაძე კი აცხადებს, რომ საქმეზე უმეტესი მოწმე ჯერ კიდევ დასაკითხია და რურუას გათავისუფლების შემთხვევაში, არსებობდა მათზე ზემოქმედების საფრთხე.

"პატიმრობაში დატოვების ძირითადი მიზეზი იყო ის გარემოება რომ ახალი შემამსუბუქებელი რაიმე არ არსებობს. ის საფრთხეები, რაც არსებობდა, ახალი დანაშაულის ჩადენის, მოწმეებზე ზემოქმედების, კვლავაც არის. ბრალდებამ უკვე 15 მოწმე დაკითხა და 24 კვლავაც დასაკითხია", — აღნიშნა პროკურორმა.

დღეს, 18 მაისს, მოსამართლემ მთავარი არხის ერთ-ერთი მეწილის, გიორგი რურუას გათავისუფლების შუამდგომლობა არ დააკმაყოფილა, შესაბამისად, გიორგი რურუა პატიმრობაში რჩება.