ბრიტანელი პარლამენტარი ჯო კოქსის წინასწარ დაგეგმილ და განზრახ მკვლელობაში მემარჯვენე ექსტრემისტი ტომას მაირი სასამართლომ დამნაშავედ სცნო და სამუდამო პატიმრობა მიუსაჯა.

ნაფიცმა მსაჯულებმა ნახეს ის ვიდეოც, რომელშიც ჯო კოქსის მკვლელობის შემდეგ ბრალდებული მის სხეულთან იარაღით ხელში ყვირის "ბრიტანეთი უპირველეს ყოვლისა, ეს ბრიტანეთის გამო მოხდა!".

ჯო კოქსი 16 ივნისს მოკლეს. მკვლელმა 41 წლის პარლამენტარს და ორი არასრულწლოვანის დედას 3 ტყვია ესროლა და შემდეგ დანით 15 ჭრილობა მიაყენა. ის ჭრილობებისგან მიღებული ტრამვით ადგილზე გარდაიცვალა.

ჯო კოქსი ლეიბორისტური პარტიის წევრი იყო. ის ბათლეის ამომრჩეველმა 2015 წელს აირჩია.

ტომას მაირი, ჯო კოქსის მკვლელი, თავის სახლთან ახლოს რამდენიმე წლის წინ.

ფოტო: SWNS

ჯო კოქსის ქვრივი ბრენდან კოქსი სასამართლოს გადაწყვეტილების შემდეგ სიტყვით გამოვიდა:

"ჩვენ აქ ანგარიშსწორებისთვის არ ვართ. ჩვენ მის მიმართ სიბრალულის მეტს არაფერს ვგრძნობთ. სამწუხაროა, რომ მისი სული მოკლებული იყო სიყვარულს და სავსე იყო სიძულვილით. მის ერთადერთ ინტერესს წარმოადგენდა თავდასხმა ქალზე, რომელიც წარმოადგენდა, თუ რა იყო კარგი ჩვენი ქვეყნისთვის".

კოქსმა მისი ცოლის მკვლელის ქმედება ტერორიზმად, სიმხდალის უმაღლეს გამოვლინებად შეაფასა:

"ეს იყო პოლიტიკური ნიშნით ჩადენილი კრიმინალი, თუმცა არაფერი იყო უფრო მეტად, ვიდრე საკუთარი თავის განადგურება".

ბრენდან კოქსმა ასევე თქვა, რომ მისი ცოლი დიდებული, თანამგრძნობი, მამაცი და კეთილი იყო, მისი ენერგია კი მუდამ მის შვილებთან იქნება. სიტყვის დასასრულს კი დასძინა, რომ იმედოვნებს, ჯოს სიკვდილით მედია და პოლიტიკოსები ბევრ რამეს ისწავლიან.

ჯო კოქსის ქმარი თავის ცოლზე საუბრისას.

ფოტო: Getty