ევროპული საქართველოს წევრი, სერგი კაპანაძე გიორგი გახარიას მიერ პარლამენტში მისვლის შესახებ განცხადებას ეხმაურება და ამბობს, რომ ის პარლამენტში მაშინ უნდა მისულიყო, როცა შეზღუდვები იყო დაანონსებული და საგანგებო მდგომარეობის გაგრძელება გადაწყვიტა.

მისი თქმით, ქართული ოცნების ხელწერად იქცა: საქმეების დაგვიანებით გაკეთება, პარლამენტის სრული უპატივცემულობა და კითხვებზე პასუხის არგაცემა.

როგორც კაპანაძე ამბობს, დაგვიანებით მისვლას და იმის შესახებ საუბარს რა გააკეთა, უმჯობესია გახარიამ პასუხები იმაზე გასცეს, აწი რას აპირებს ეკონომიკის ჩიხიდან გამოსასვლელად.

"ბუნებრივია, მიუხედავად ამისა, როდესაც ის მოვა პარლამენტში, ოპოზიციას ექნება კონკრეტული კითხვები და ეს კითხვები უკავშირდება ახლა უკვე ძალიან მნიშვნელოვან მიმართულებას, რომელიც არის ეკონომიკური კრიზისიდან გამოსვლის გზები და ის ნაბიჯები, რომლებიც უნდა გადაიდგას იმისთვის, რომ ეს ძალიან მძიმე ეკონომიკური ვითარება დროულად იქნას გამოსწორებული. აქამდე რაც მოვისმინეთ მისგან და მთავრობისგან, ის ნაბიჯები არაადეკვატური, არასაკმარისი და დაგვიანებულია", — განაცხადა კაპანაძემ.

პრემიერმინისტრმა გიორგი გახარიამ, დღეს, 15 მაისს, განაცხადა, რომ მზადაა საგანგებო მდგომარეობის დროს ქვეყნის მართვასთან დაკავშირებით დაგროვილ კითხვებს ნებისმიერი ფორმით უპასუხოს, მათ შორის, პარლამენტში. მან ასევე აღნიშნა, რომ ასეთივე მზაობა აქვთ მთავრობის სხვა წევრებსაც.

"მე მესმის და მსმენია, რომ საზოგადოებაში დაგროვდა გარკვეული კითხვები, საინტერესო კითხვები და მათ შორის აბსოლუტურად ობიექტური კითხვები იმასთან დაკავშირებით, თუ როგორ მოქმედებდა მთავრობა საგანგებო მდგომარეობის პირობებში და ამ კითხვებზე პასუხების გასაცემად მინდა განვაცხადო მზაობა როგორც ჩემი პირადად, ასევე მთავრობის თითოეული წევრის, ნებისმიერი სახით, პარლამენტშიც მათ შორის", — თქვა მან.

გახარიამ პარლამენტის თავმჯდომარე მიმართა, რომ როცა საკანონმდებლო ორგანო საჭიროდ ჩათვლის, მთავრობა ეახლება და დეტალურად წარუდგენს ანგარიშს, როგორ მართავდა ქვეყანას საგანგებო მდგომარეობის პირობებში.