რეჟისორი ჯორჯ მილერი გეგმავს, რომ მაყურებელმა Mad Max-ის სამყაროს შესახებ კიდევ უფრო მეტი გაიგოს და 2015 წელს გამოსული ბლოკბასტერის Fury Road პრიქველის გადაღებაზე მუშაობს.

ამ ცნობილ რეჟისორთან The New York Times-მა მომავალი გეგმების შესახებ ინტერვიუ ჩაწერა, სადაც მილერმა აღნიშნა, რომ შემდეგი ფილმის სიუჟეტი შარლიზ ტერონის პერსონაჟის, ფურიოსას ირგვლივ განვითარდება და ამ გმირის ცხოვრების ადრეულ წლებზე მოგვითხრობს.

სწორედ ამის გამო ის მომავალი ფილმისთვის ახალგაზრდა მსახიობს ეძებს. როგორც თავად ამბობს, მას შეეძლო შარლიზ ტერონის გასაახალგაზრდავებლად სპეციალური კომპიუტერული ტექნოლოგია გამოეყენებინა, თუმცა საბოლოოდ ამ ხერხზე უარი თქვა.

"დიდხანს მეგონა, რომ შარლიზის გასაახალგაზრდავებლად სპეციალურ კომპიუტერულ გრაფიკას გამოვიყენებდით, მაგრამ ახლა ასე აღარ ვფიქრობ. The Irishman-ში გამოყენებული მსგავსი გაბედული ხერხის მიუხედავად, მისი გამოყენება მაინც სარისკო მგონია", — ამბობს ჯორჯ მილერი.

Fury Road-ში თითქმის ყველა მთავარი გმირის წარსული ცხოვრების შესახებ ვიგებთ დეტალებს, თუმცა ფურიოსას გამოცდილებაზე ბევრი არაფერი ვიცით. მომავალ ფილმში სწორედ ამ ძლიერი და ბოლო წლების ერთ-ერთი ყველაზე საინტერესო კინოგმირი ქალის წარსული ცხოვრების შესახებ გავიგებთ.

მართალია, შარლიზ ტერონის გარეშე, თუმცა რას გავაწყობთ, მან უკვე გვაჩუქა საკულტო როლი და ის კიდევ დიდხანს გვემახსოვრება.

ფოტო: Warner Bros.