უკვე გესაუბრეთ სერიალების იმ ათი პერსონაჟი კაცის შესახებ, რომლებიც თავიანთი მეტ-ნაკლებად უარყოფითი თვისებების მიუხედავად, მაყურებლების სიმპათიას მაინც იმსახურებენ.

მკითხველების დიდმა ნაწილმა შემოთავაზებული (ანტი)გმირების მიმართ ეს დამოკიდებულება გაიზიარა და დამატებით თავიანთი ვერსიებიც შემოგვთავაზეს. როგორც უკვე ვახსენეთ, მსგავსი ნაკლებად დადებითი პერსონაჟები ხშირად იმიტომ გვიტაცებს, რომ სრულყოფილ პროტაგონისტებზე უფრო საინტერესოდ მივიჩნევთ, მაგრამ რას ვიტყვით იმ პერსონაჟებზე, რომლებსაც ამ ორი მხარის დაპირისპირების გამო სათანადოდ ვერ ვამჩნევთ?

ფოტო: Giphy

ამ სტატიაში სწორედ იმ პერსონაჟი კაცების შესახებ მოგითხრობთ, რომლებიც უმეტესად კონკრეტულ სერიალში მთავარი მოქმედი გმირები არ არიან, რის გამოც მათ შესახებ ბევრს ვერაფერს ვიგებთ და ყურადღებას სხვებს უფრო ვუთმობთ, არადა ჩვენს სიმპათიას, ალბათ, ისინი უფრო იმსახურებენ, ვიდრე პერი რაითის მსგავსი მკვეთრად უარყოფითი პერსონაჟები.

1. ედ მაკენზი Big Little Lies-დან

ფოტო: HBO

მიუხედავად იმისა, რომ რიზ უიზერსპუნის პერსონაჟი მედლინი ყველას გვიყვარს, უნდა ვაღიაროთ, რომ ის საკმაოდ რთული პიროვნებაა და მის გაგებას ყველა ვერ შეძლებდა. აი, ედ მაკენზიმ კი ეს ნამდვილად შეძლო და მეტიც — დაშვებული შეცდომების გულისხმიერად გაგებასა და ცოლის მუდმივ მხარდაჭერასაც ცდილობდა.

2. ჯონათან ბაიერსი Stranger Things-დან

ფოტო: Netflix

ინტროვერტობის გამო ჯონათანისნაირი ბიჭის უპირატესობებს იშვიათად ამჩნევენ: მას ყოველთვის დაჩრდილავს ვინმე სტივი ან ბილი. არადა ის ამ სერიალის ერთ-ერთი ყველაზე საინტერესო გმირია, რომელსაც ერთგულებაც შეუძლია და არც გამბედაობა აკლია.

3. ჯინ კვონი Lost-დან

ფოტო: ABC

ამ სერიალში ნამდვილად რთულია ფავორიტი პერსონაჟის გამორჩევა, თუმცა ფანების უმეტესობა ორ ბანაკად — ჯეკის და სოიერის მომხრეებად — გაიყო, არადა ჯინიც ის გამორჩეული გმირია, რომელიც ჩვენგან მეტ ყურადღებას იმსახურებს: სხვა თუ არაფერი, სანის მიმართ მისი უპირობო სიყვარული ერთ-ერთი ყველაზე შთამაგონებელი და ემოციური ისტორიაა სატელევიზიო სივრცეში.

4. დოქტორი მანჰეტენი Watchmen-დან

ფოტო: HBO

მართალია, დოქტორი მანჰეტენი სხვა ბევრი წარმოუდგენელად საოცარი შესაძლებლობის გამოც შეიძლება მოგწონდეთ, მაგრამ HBO-ს ამ სერიალში ის განსაკუთრებული სიმპათიის ღირსი იმიტომაც არის, რომ სიყვარულის გამო სწორედ ამ ღვთაებრივ შესაძლებლობებზე ამბობს უარს.

5. ჯორაჰ მორმონტი Game of Thrones-დან

ფოტო: HBO

ჯონ სნოუს მსგავსი მომხიბვლელი კაცის გვერდით ჯორაჰის შემჩნევა, ალბათ, რთულია, მაგრამ არც ის უნდა დაგვავიწყდეს, რომ სწორედ ჯონ სნოუმ შეიძლება ჩაგვცეს ბოლოს დანა გულში.

6. ერნანდო Sense8-დან

ფოტო: Netflix

სიუჟეტიდან გამომდინარე ამ სერიალში ისეთი პერსონაჟები უკეთესად გავიცანით, როგორებიც ვოლფგანგი და უილი არიან, რის გამოც მაყურებლებმა ისინი უფრო შეიყვარეს, ვიდრე, ვთქვათ, ერნანდო. არადა ისიც არანაკლებ საინტერესო პერსონაჟია, რომელიც ლიტოს მუდმივად მხარში უდგას და რთული გადაწყვეტილებების მიღებაში ეხმარება.

7. ენდი ბერნარდი The Office-დან

ფოტო: NBC f

The Office-ის ერთ-ერთი ყველაზე ერთგული და დაუფასებელი პერსონაჟი ენდი ბერნარდია, რომელიც თქვენ გამო დვაითთან ჩხუბსაც კი არ შეუშინდებოდა!

8. ფესკო Euphoria-დან

ფოტო: HBO

ალბათ, ყველა ვთანხმდებით, რომ ფესკო თავისი სარისკო საქმიანობის მიუხედავადაც კი სჯობია ნეითს: ნარკოდილერი მხოლოდ თავის გასატანადაა და ამ არც ისე საამაყო საქმის მიუხედავად ადამიანურ ღირსებებს მაინც არ კარგავს.

9. ლილ პაპი Pose-დან

ფოტო: FX

რთულია, ამ პერსონაჟმა ვინმეში უარყოფითი ემოცია გამოიწვიოს, თუმცა ეს საკმარისი არ არის: ისეთი გულწრფელი, ერთგული და მხიარული, როგორიც ლილ პაპია, გაცილებით მეტ ყურადღებას იმსახურებს ჩვენგან.

10. კარლოსი Desperate Housewives-დან

ფოტო: ABC

ნამდვილად გაგვიჭირდება იმის თქმა, რომ კარლოსი სრულყოფილი პერსონაჟია, თუმცა თუ ეს სერიალი გინახავთ, ისიც გემახსოვრებათ, რომ ვისტერია ლეინზე სრულყოფილი არც არავინაა. სანაცვლოდ კი ვიცით, რომ მას გაბი გულწრფელად ყველაზე მეტად უყვარდა და მის ყველაზე უჩვეულო ახირებებსაც კი გაგებით ეკიდებოდა, რაც მის დადებითად შესაფასებლად უკვე საკმარისია.

კიდევ ვის დაამატებდით ამ სიაში?