საქართველოში ევროკავშირის ელჩმა, კარლ ჰარცელმა საქართველოს ევროპის დღე მიულოცა და ამასთან დაკავშირებით განცხადება გაავრცელა.

ელჩმა თავის მიმართვაში ევროკავშირსა და საქართველოს შორის ურთიერთობაზე ისაუბრა და აღნიშნა, რომ პარტნიორები და მეგობრები ყველაზე მეტად სწორედ კრიზის დროსაა საჭირო.

"ნათქვამია "კარგი მეგობარი გაჭირვებაში იცნობაო". ამიტომ, ჩემთვის საამაყოა, რომ ევროკავშირი, მისი წევრი სახელმწიფოები და საფინანსო ინსტიტუტები — ანუ "ევროპის გუნდი", გააქტიურდნენ ამ გამოწვევის დასაძლევად იმის მტკიცე დასტურად, რომ ჩვენი მეგობრობა მხოლოდ სიტყვები არ არის. ჩვენ ნამდვილი მეგობრები ვართ. დაუღალავი მუშაობისა და მტკიცე პოლიტიკური ნების წყალობით, ჩვენ მოვახერხეთ 1,5 მილიარდი ლარის მობილიზაცია, რათა დავეხმაროთ საქართველოს კრიზისის დაძლევაში", — განაცხადა ჰარცელმა.

კარლ ჰარცელის შეფასებით, სხვა ქვეყნებთან შედარებით, საქართველომ, ამ გამოწვევასთან გამკლავება ბევრი მიმართულებით უკეთესად შეძლო. მისი თქმით, ეს იქნება რთული წელი როგორც ევროკავშირისთვის, ასევე საქართველოსთვის, მაგრამ "ერთად ჩვენ ძლიერები ვართ და ერთად ყველაფერს მოვერევით".

"საქართველომ, სადაც სტუმართმოყვარეობა და სოლიდარობა ეროვნული იდენტობის შემადგენელი ნაწილია, კარგად იცის მეგობრის ფასი. მინდა მადლობა გადავუხადო საქართველოს იმ თანაგრძნობისთვის, რომელსაც ის გასული კვირების განმავლობაში ევროკავშირის წევრ სახელმწიფოებს და მის მოსახლეობას უცხადებდა" — განაცხადა ჰარცელმა.

9 მაისს ევროკავშირი და მისი წევრი სახელმწიფოები ევროპის დღეს ზეიმობენ, რომელიც 1950 წლის, შუმანის ისტორიული დეკლარაციის აღსანიშნავად დაწესდა. მეორე მსოფლიო ომის ნანგრევებზე გაკეთებულ ამ მიმართვაში ჩამოყალიბებული იყო ევროპის სახელმწიფოებს შორის თანამშრომლობის იდეა, რომელმაც საფუძველი ჩაუყარა თანამედროვე ევროკავშირის შექმნას.

2020 წლის ევროპის დღის მთავარი მოწოდებაა — "ერთად უფრო ძლიერები ვართ", რაც ხაზს უსვამს COVID-19-ს პირობებში ერთიანობის აუცილებლობას.