მანამ, სანამ, დონალდ ტრამპის ინაუგურაცია შედგება და ის ამერიკის პრეზიდენტი ოფიციალურად გახდება, რესპუბლიკელი ლინდსი გრეჰემი და ჯონ მაკკეინი საქართველოს, უკრაინასა და ესტონეთს ოფიციალური ვიზიტით ეწვევიან.

იანვარში ამერიკელი სენატორები კონგრესის დელეგაციას უხელმძღვანელებენ. ინფორმაციას ვაშინგტონპოსტი ავრცელებს.

ვიზიტის მიზანია, ამერიკის ევროპელ პარტნიორებს ვაშინგტონმა შეახსენოს, რომ ისინი კვლავ მიუღებლად მიიჩნევენ რუსეთის აგრესიას.

ჯონ მაკკეინი და ლინდსი გრეჰემი ვიზიტების ფარგლებში განიხილავენ რუსეთის დანაშაულებრივ ქმედებებს, სხვა ქვეყნის ტერიტორიებზე შეჭრის ფაქტებს, ასევე სირიაში ჩადენილ სამხედრო დანაშაულს, პროპაგანდისტულ კამპანიებს, ვებ-თავდასხმებსა და იმ საფრთხეებს, რასაც ის ბალტიისპირეთის ქვეყნებს უქმნის.

მაკკეინმა და გრეჰემმა გასულ კვირას განაცხადეს, რომ მიუღებელია ტრამპის მხრიდან რუსეთთან ურთიერთობის დალაგების მცდელობა. გრეჰემმა დასძინა, რომ თუ რუსეთის დანაშაულებრივი ქმედებები გამოიკვეთება ამერიკის საპრეზიდენტო არჩევნებთან მიმართებაში, პუტინი უნდა დაისაჯოს.