პროკურატურის განცხადებით, დაბა გუდაურში ორი პირის განზრახ მკვლელობის მცდელობისა და ერთი პირის განზრახ მკვლელობის ფაქტზე მ.კ-ს ბრალდება დაზუსტდა. უწყების განცხადებით, მ.კ.-ს ბრალდება ძალადობისთვის სისხლის სამართლის კოდექსის 126-ე მუხლის პირველი ნაწილითაც წარედგინა.

მათივე ინფორმაციით, მ.კ.-ს მიმართ ჯგუფურად განხორციელებული ძალადობის ფაქტზე ბრალი 6 პირს წარედგინა.

შემთხვევა გუდაურში 16 თებერვალს, მოხდა. უწყების ინფორმაციით, ბრალდებულმა გუდაურის ახალ დასახლებაში ერთ-ერთ მშენებარე კორპუსის მიმდებარე ტერიტორიაზე, უმიზეზოდ, 19 წლის მ.უ სცემა. მან დასახმარებლად მეგობრებს მიმართა, რომელთაგან ერთ-ერთმა მ.კ-ს ფიზიკური შეურაცხყოფა მიაყენა.

"განაწყენებული მ.კ. ავტომანქანაში შენახული ცეცხლსასროლი პისტოლეტით შეიარაღდა და დაახლოებით 06:00 საათზე, გუდაურის ახალ დასახლებაში მდებარე რედკო-ს კუთვნილ ერთ-ერთი კორპუსის მიმდებარე ტერიტორიაზე, შურისძიების მოტივით, განზრახ მოკვლის მიზნით, GLOCK 17-ის მოდელის ცეცხლსასროლი იარაღით მ.უ.-ს მეგობრების თ.გ-ს და დ.ს-ს მისამართით განახორციელა გასროლები. მიყენებული დაზიანებების შედეგად თ.გ. გარდაიცვალა", — წერია პროკურატურის განცხადებაში.

უწყება აცხადებს, რომ მ.კ -ს ჯგუფურად ცემის ფაქტზე ცალკე წარმოებად გამოიყო სისხლის სამართლის საქმე და გამოტანილი იქნა დადგენილება მ.კ.-ს დაზარალებულად ცნობის თაობაზე. მ.კ.-ს ჯგუფურად ცემის ფაქტზე 6 პირს ბრალდება საქართველოს სისხლის სამართლის კოდექსის 126-ე მუხლის პირველი პრიმა ნაწილის "ბ" ქვეპუნქტით წარედგინა.