ჯანდაცვის მინისტრი, ეკატერინე ტიკარაძე იმ კადრებზე, სადაც ჩანს რომ საგანგებო ვითარების ფარგლებში დაწესებული შეზღუდვების დროს მძღოლის გვერდით ჯდება, განმარტებას აკეთებს და ამბობს, რომ საგანგებო მდგომარეობის აღმსრულებელს აქვს უფლება საგანგებო მდგომარეობაში მსგავსად მოიქცეს.

მინისტრის თქმით, "პირველი დარტყმის" საკუთარ თავზე აღება უმჯობესად ჩათვალა.

"მე ჩავთვალე, რომ ჩვენი ოპონენტები მეტად უფრო დეტალურად შეისწავლიან საქართველოს კანონმდებლობას და დადგენილებებს, თუმცა ეს არ მოხდა და მიუხედავად ჩვენი განცხადებისა, რადგან ეს კითხვა კვლავ არის ღია, თქვენი ეთერის საშუალებით განვმარტავ, რომ საქართველოს მთავრობის 181-ე დადგენილების მე-2 პუნქტის თანახმად, საგანგებო მდგომარეობის აღმსრულებელს აქვს უფლება საგანგებო მდგომარეობაში მიიღოს მსგავსი გადაწყვეტილებები, რომელიც არის აუცილებელი ხშირ შემთხვევაში. და ეს იყო სწორედ ის მომენტი, როდესაც იყო მნიშვნელოვანი სატრანსპორტო საშუალების მცირე ოდენობით მომხდარიყო ადამიანების მაქსიმალური რაოდენობის გადაყვანა. შესაბამისად, მე ჩავთვალე, რომ პირველი დარტყმა, უმჯობესი იყო, ვინაიდან საგანგებო მდგომარეობის მიზეზი მე გახლავართ, ამეღო ჩემს თავზე", — განაცხადა ტიკარაძემ ღამის კურიერის ეთერში.