ეკონომიკის მინისტრი ნათია თურნავა, ოპოზიციის წარმომადგენლებს ურჩევს, რომ ანტიკრიზისულ გეგმის პროგრამას გაეცნონ და უკეთ მოემზადონ. მისი თქმით, ოპოზიციის მხრიდან პოლიტიკურ სპეკულაციებსა და პოპულიზმს არ მიიღებენ. ამ თემაზე მინისტრმა კითხვას პრესკონფერენციაზე უპასუხა.

"ნებისმიერ კონსტრუქციულ დიალოგში და პოლემიკაში ყოველთვის შევალთ, ნებისმიერ კონსტრუქციულ შემოთავაზებას გავითვალისწინებთ, იმიტომ, რომ კორონავირუსი ისეთი გამოწვევაა, რომლის წინაშეც ყველანი უნდა დავკონსოლიდირდეთ, ყველას საღი აზრი მისაღებია. არ მივიღებთ პოპულიზმს, არ მივიღებთ კორონავირუსის პოლიტიკური კონიუნქტურისთვის გამოყენების მცდელობას და არ მივიღებთ პოლიტიკურ სპეკულაციებს", — თქვა ნათია თურნავამ.

მინისტრმა აღნიშნა, რომ ანტიკრიზისული გეგმითა და მთავრობის ნაბიჯებით ოპოზიციას ბევრი სათქმელი არ დაუტოვეს. მისი აზრით, ის შეფასებები, რაც ოპონენტების მხრიდან ისმის სრულიად ურთიერთგამომრიცხავია.