25 აპრილს სატელევიზიო შოუ Saturday Night Live-ში ბრედ პიტი გამოჩნდა და კომედიურ სკეტჩში აშშ-ის ალერგიისა და ინფექციური დაავადებების ეროვნული ინსტიტუტის ხელმძღვანელი ენტონი ფაუჩი განასახიერა. ამ ფაქტს თავად ფაუჩი გამოეხმაურა და პიტის შესრულება დადებითად შეაფასა.

"ბრედ პიტის დიდი ფანი ვარ და როცა ვინმე მეკითხება, თუ ვის ვისურვებდი, რომ ჩემი როლი შეესრულებინა, ყოველთვის ბრედ პიტს ვასახელებ. ის ერთ-ერთი ჩემი საყვარელი მსახიობია. ვფიქრობ, მან ამ სკეტჩში თავი შესანიშნავად გაართვა ყველაფერს და ბოლოს, როცა პარიკი მოიხსნა და სამედიცინო პერსონალს მადლობა გადაგვიხადა, ისიც აჩვენა, რომ შესანიშნავი ადამიანია: ის არა მარტო ნამდვილად კარგი მსახიობი, არამედ კარგი ადამიანიცაა", — განაცხადა ენტონი ფაუჩიმ.

რამდენიმე კვირის წინ ენტონი ფაუჩიმ მართლაც თქვა საჯაროდ, რომ სურდა მისი პიროვნება ბრედ პიტს განესახიერებინა, ცოტა ხანში კი სურვილი აუხდა კიდეც.

SNL-ში ოსკაროსანმა მსახიობმა, ბრედ პიტმა ენტონი ფაუჩის როლი მოირგო და მედიაში კორონავირუსის შესახებ გავრცელებულ დეზინფორმაციის გაბათილება მეცნიერული ცოდნით სცადა.

უფრო კონკრეტულად კი ის დონალდ ტრამპის განცხადებებს გამოეხმაურა: მაგალითად, გაიხსენა პრეზიდენტის მოსაზრება, რომ კორონავირუსის "ტესტები მშვენიერია" და ეს განცხადება ასე შეაფასა:

"ტესტები ნამდვილად მშვენიერია, თუ "მშვენიერების" იდეა ბამბის ჩხირის ცხვირიდან ტვინამდე შეღიტინებით გესმის".

ენტონი ფაუჩისთან ერთად პიტის ამ მონოლოგით კიდევ მრავალი მაყურებელი მოიხიბლა. მისი სკეტჩის სრულად ნახვა ამ ვიდეოში შეგიძლიათ: