ერთ-ერთი ყველაზე ცნობილი კომედიური სატელევიზიო შოუ Saturday Night Live პანდემიისას გადაცემების ჩაწერას დისტანციურად აგრძელებს. ამ უჩვეულო ფორმატის ახალ გადაცემაში კი ბრედ პიტიც გამოჩნდა.

მსახიობმა მაყურებლებს კომიკური სკეტჩი შესთავზა, რომელშიც აშშ-ის ალერგიისა და ინფექციური დაავადებების ეროვნული ინსტიტუტის ხელმძღვანელი ენტონი ფაუჩი განასახიერა და კორონავირუსის შესახებ გავრცელებული დეზინფორმაციის გაბათილება სცადა. უფრო კონკრეტულად კი ამერიკის პრეზიდენტის დონალდ ტრამპის საჯარო განცხადებებს გამოეხმაურა.

მაგალითად, მან გაიხსენა პრეზიდენტის დაპირება, რომ ვაქცინა "შედარებით მალე" იქნება მზად. ენტონი ფაუჩის როლში მოვლენილმა ბრედ პიტმა ამ მოსაზრებას ასე უპასუხა:

"შედარებით მალე" საინტერესო ფრაზაა. დედამიწის მთელ ისტორიასთან შედარებით? მაშინ, რა თქმა უნდა, ვაქცინა მალე იქნება მზად. მაგრამ თუ მეგობარს ეტყვი, რომ "შედარებით მალე შეხვდები" და წელიწად-ნახევრის შემდეგ გამოჩნდები, მაშინ შენი მეგობარი, ალბათ, შედარებით გაბრაზებული იქნება".

ფაუჩის განსახიერებისას ბრედ პიტმა ასევე გაიხსენა ტრამპის ფრაზა, რომ კორონავირუსის "ტესტები მშვენიერია" და ეს განსაზღვრება პრეზიდენტს ასე შეუფასა:

"ტესტები ნამდვილად მშვენიერია, თუ "მშვენიერების" იდეა ბამბის ჩხირის ცხვირიდან ტვინამდე შეღიტინებით გესმის".

Time-ის ცნობით, რამდენიმე კვირის წინ ენტონი ფაუჩიმ იხუმრა, რომ Saturday Night Live-ში ბრედ პიტს მისი პიროვნება აუცილებლად უნდა განესახიერებინა და როგორც ჩანს, მისი სურვილი "შედარებით" არა, ნამდვილად მალე ასრულდა.

ფოტო: Giphy

თავისი გამოსვლის შემდეგ ბრედ პიტმა პარიკი მოიხსნა და ამჯერად სრული სერიოზულობით გადაუხადა მადლობა როგორც ფაუჩის, ისე სხვა სამედიცინო პერსონალს:

"მადლობა, ექიმ ფაუჩის იმ სიმშვიდისა და კეთილგონიერებისთვის, რომელსაც ამ გაუსაძლის დროს იჩენს. ასევე მადლობა ყველა იმ სამედიცინო პერსონალს, სწრაფი რეაგირების ბრიგადებსა და მათი ოჯახის წევრებს, რომლებსაც წინა ხაზზე უწევთ ყოფნა".