განზრახ მკვლელობის მცდელობისთვის დაკავებული ყინწვისის მამათა მონასტრის წინამძღვრის, მამა დავითის ადვოკატი, ალექსანდრე კობაიძე ამბობს, რომ მისი დაცვის ქვეშ მყოფი დუმილის უფლებას იყენებს.

როგორც ადვოკატმა ჟურნალისტებს განუცხადა, სასულიერო პირი ბრალდების მხარეს მთელ რიგი საკითხებში, რომელიც მის წინააღმდეგაა წარდგენილი, არ ეთანხმება.

უფლებადამცველის ინფორმაციით, საქმეში პირდაპირი მოწმეები არ არიან და ირიბი მოწმეები არიან.

"მამაომ დაგვიდასტურა, რომ მთელი რიგი ფაქტობრივი გარემოებები არ შეესაბამება რეალობას. იგი ამ დრომდე დუმილის უფლებას იყენებს. ფაქტობრივ გარემოებებს არ ვეთანხმებით არც ერთ ნაწილში. იარაღზეა საუბარი და არანაირი იარაღი არ არის გამოყენებული, ამოღებული. არ არსებობს იარაღი. პირველ რიგში მამაომ მის მრევლს მოუწოდა სიმშვიდისკენ, დალოცა და მხნედ გრძნობს თავს", — განაცხადა ალექსანდრე კობაიძემ.

ყინწვისის მამათა მონასტრის სასულიერო პირი განზრახ მკვლელობის მცდელობის ბრალდებით 27 აპრილს დააკავეს. შინაგან საქმეთა სამინისტროს ცნობით, ბრალდებულმა, გორის რაიონის სოფელ რიეთის საავტომობილო გზაზე გადაადგილებისას, სავარაუდოდ, ავტომატური ცეცხლსასროლი იარაღიდან ცეცხლი გაუხსნა დაზარალებულის მართვის ქვეშ მყოფ ავტომანქანას, რის შემდგომაც შემთხვევის ადგილიდან მიიმალა.

მათივე ცნობით, მომხდარზე გამოძიება სისხლის სამართლის კოდექსის 19-108-ე მუხლით და 236-ე მუხლის მე-3 და მე-4 ნაწილებით გრძელდება, რაც განზრახ მკვლელობის მცდელობასა და ცეცხლსასროლი იარაღის უკანონო შეძენა-შენახვას გულისხმობს და 7-დან 15 წლამდე ვადით თავისუფლების აღკვეთას ითვალისწინებს.

მედიაში გავრცელებული ინფორმაციით, ყინწვისის მონასტრის წინმძღვარმა, მამა დავითმა ყინწვისის კეთილგონიერი ავაზაკის წინამღვარი, არქიმანდრიტი საბა ჟღენტი დაჭრა.

თავად არქიმანდრიტი საბა ჟღენტი უარყოფდა, რომ იგი სასულიერო პირმა დაჭრა. მისი თქმით, დაჭრასთან დაკავშირებით ცრუ ინფორმაცია გავრცელდა და ამით "გულნატკენია".

რუის-ურბნისის ეპარქიაში სასულიერო პირის დაჭრას ეპარქიის მიტროპოლიტი იობი უარყოფდა.