შინაგან საქმეთა სამინისტროს ინფორმაციით, ბათუმში ამერიკელ კოლეგებთან ერთად ჩატარებული სპეცოპერაციის შემდეგ 40 კილოგრამამდე ნარკოტიკული საშუალება ჰეროინი ამოიღეს.

უწყების ინფორმაციით, სპეცოპერაციის შემდეგ საერთაშორისო ნარკოდამნაშავეთა ორგანიზებული ჯგუფი გამოავლინეს და ადგილზე ბულგარეთის 2 მოქალაქე დააკავეს.

"ბრალდებულებმა მსუბუქ ავტომანქანაში მოწყობილი სპეციალური სამალავის მეშვეობით, სომხეთის რესპუბლიკიდან, საერთაშორისო გადაზიდვის მიზნით საქართველოში უკანონოდ შემოიტანეს 40 კილოგრამამდე ნარკოტიკული საშუალება ჰეროინი. ინახავდნენ ქალაქ ბათუმში, სპეციალურად მოწყობილ ადგილზე და აღნიშნული ნარკოტიკების ევროპაში გადაზიდვას აორგანიზებდნენ", — წერია უწყების განცხადებაში.

შინაგან საქმეთა სამინისტროს განცხადებით, ამოღებული ნარკოტიკის ღირებულება შავ ბაზარზე 2 მილიონ დოლარს აჭარბებს.

მომხდარზე გამოძიება საქართველოს სისხლის სამართლის კოდექსის 260-ე მუხლის მე-6 ნაწილის "ა" ქვეპუნქტით და 262-ე მუხლის მე-4 ნაწილის "ა" ქვეპუნქტით აწარმოებს. დანაშაული 20 წლამდე ან უვადო თავისუფლების აღკვეთას ითვალისწინებს.