როგორ ვიყოთ ფიზიკურად აქტიურები კარანტინში — WHO-ს რეკომენდაციები
![](http://phoebe.on.ge/2020/04/24/1587726303.gif)
ფოტო: Harsh Vijay / Dribbble
კორონავირუსის გავრცელების გამო მსოფლიოს თითქმის ყველა კუთხეში მოუწოდებენ ადამიანებს, რომ აუცილებლობის გარდა დრო უსაფრთხოების ზომების დაცვით თვითიზოლაციაში გაატარონ.
ამან, რა თქმა უნდა, გამოიწვია ის, რომ სასწავლო და სამუშაო პროცესების დიდმა ნაწილმა დისტანციურ რეჟიმში გადაინაცვლა, შესაბამისად, ადამიანები დროს ძირითადად სახლში ატარებენ და ფიზიკურად ნაკლებად დატვირთულები არიან.
იმის გამო, რომ სავარჯიშო თუ სხვა მსგავსი ფიზიკური აქტივობისთვის განკუთვნილი დაწესებულებებიც დროებით დაკეტილია, ჩვეული რუტინა მილიონობით ადამიანს დაერღვა და პროფესიული ვარჯიშით დაკავების შესაძლებლობაც აღარ აქვს.
ამასთან დაკავშირებით მსოფლიო ჯანდაცვის ორგანიზაციამ სპეციალური რეკომენდაციები გაავრცელა, სადაც ვკითხულობთ, რომ ნაკლებ ფიზიკურ აქტივობას ჯანმრთელობის მდგომარეობის გაუარესება შეიძლება მოჰყვეს:
"მუდმივად მჯდომარე მუშაობის რეჟიმსა და ნაკლებ ფიზიკურ აქტივობას ჩვენს ჯანმრთელობაზე, კეთილდღეობასა და ცხოვრების ხარისხზე უარყოფითი გავლენის მოხდენა შეუძლია. თვითიზოლაციამ ასევე შეიძლება გამოიწვიოს სტრესი და სხვა ფსიქიკური პრობლემები გაამწვავოს".
მსოფლიო ჯანდაცვის ორგანიზაციის განცხადებით, იმისათვის, რომ ეს უარყოფითი შედეგები თავიდან ავირიდოთ, საჭიროა კვირაში თუნდაც 150 წუთის განმავლობაში ფიზიკური აქტივობით დავკავდეთ. ამას კი არც რაიმე განსაკუთრებული აღჭურვილობა ან პროფესიონალური მომზადება არ სჭირდება.
გაეცანით WHO-ს რამდენიმე რეკომენდაციას:
დღის განმავლობაში მცირეხნიანი ფიზიკურად აქტიური შესვენებები მოუწყეთ საკუთარ თავს
![](http://phoebe.on.ge/2020/04/24/1587725103.gif)
ფოტო: Henrique Barone / Dribbble
მცირე შესვენებები თქვენი კვირის განმავლობაში შესასრულებელ აუცილებელ რეკომენდაციებში უნდა შეიტანოთ. შეგიძლიათ ყოველდღიურად რამდენიმე წუთი სხვადასხვა სახის ვარჯიშს დაუთმოთ ან კიდევ ცეკვით, ბავშვებთან თამაშით თუ საშინაო საქმეების შესრულებით (დალაგება, მებაღეობა) დაკავდეთ, რაც ასევე დაგეხმარებათ, რომ სახლში ყოფნისას ზედმეტად არ მოდუნდეთ.
დაიწყეთ ვარჯიში ონლაინ გაკვეთილების დახმარებით
![](http://phoebe.on.ge/2020/04/24/1587725306.gif)
ფოტო: Muhammad Raza / Dribbble
ინტერნეტში ვარჯიშის უამრავ ონლაინ გაკვეთილს გადააწყდებით, რომლებითაც სარგებლობა სრულიად უფასოდ შეგიძლიათ. ოღონდ თუ აქამდე მსგავსი გამოცდილება საერთოდ არ გქონიათ, ფრთხილად იყავით და საკუთარ შესაძლებლობებს თავიდანვე ზედმეტად ნუ გადააჭარბებთ.
ამაში ასევე დაგეხმარებათ მობილური აპლიკაციები, რომლებიც დროის ეფექტურად გადანაწილებასა და სხეულის მართვაში შეგიწყობთ ხელს.
ფეხით იარეთ
![](http://joey.on.ge/2020/04/24/1587725549.gif)
ფოტო: Neos Studio / Dribbble
უბრალოდ იარეთ. თუნდაც პატარა სივრცეში წრეზე ან ერთ ადგილას სიარული თქვენს სხეულს აქტიურად ყოფნაში დაეხმარება. თუ ტელეფონზე საუბრობთ, ჯდომის ნაცვლად წამოდექით და საუბრისას იარეთ. ხოლო თუ გარეთ გადაწყვეტთ სეირნობას ან ვარჯიშს, დარწმუნებული იყავით, რომ სხვებისგან მინიმუმ ერთმეტრიან დისტანციას დაიცავთ.
ფეხზე წამოდექით
![](http://chandler.on.ge/2020/04/24/1587725872.gif)
ფოტო: Arun Raj / Dribbble
მჯდომარე რუტუნის შემცირება უბრალოდ ფეხზე წამოდგომითაც შეგიძლიათ. როცა შესაძლებელია, ეს მაშინ გააკეთეთ, იდეალურ შემთხვევაში კი ყოველ 30 წუთში უნდა ადგეთ სკამიდან. რამდენ ხანსაც შეგიძლიათ, ფეხზე მდგარმა გააგრძელეთ მუშაობა: მაღალი მაგიდის ან სხვა ნივთების დახმარებით. თავისუფალი დროის მჯდომარედ გატარებისას უპირატესობა მიანიჭეთ შემეცნებით აქტივობებს, იქნება ეს კითხვა, სამაგიდო თამაშები თუ ფაზლები.
მოდუნდით
![](http://ross.on.ge/2020/04/24/1587725954.gif)
ფოტო: Grégory Villien / Dribbble
მედიტაცია და ღრმად სუნთქვა სიმშვიდის შენარჩუნებაში დაგეხმარებათ.
ამ ყველაფერთან ერთად მსოფლიო ჯანდაცვის ორგანიზაცია მოგვიწოდებს, რომ მაქსიმალურად ვეცადოთ, ყოველდღიური რაციონი ჯანსაღი საკვებით შევავსოთ :
"ტკბილი სასმელების ნაცვლად დალიეთ უფრო მეტი წყალი. შეზღუდეთ ან მთლიანად შეამცირეთ ალკოჰოლის მიღება, განსაკუთრებულად კი მოზარდებში, ორსულებსა და სხვადასხვა ჯანმრთელობის პრობლემების მქონე ადამიანებში. მიიღეთ ბევრი ხილი და ბოსტნეული, სანაცვლოდ კი შეამცირეთ შაქრის, მარილისა და ცხიმების მიღება".
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
-
გადახედვა
-
გადახედვა
-
გადახედვა
-
გადახედვა
-
გადახედვა
-
კომენტარები