ინფექციური საავადმყოფოს დირექტორის, თენგიზ ცერცვაძის განცხადებით, კორონავირუსით ინფიცირებულთა სამკურნალოთ, საქართველოში შესაძლოა, სისხლის პლაზმის გადასხმის მეთოდი გამოიყენონ. ცერცვაძემ ამის შესახებ მოამბის ეთერში ისაბრა და განმარტა, რომ გარკვეული გზა უკვე გაიარეს ამ მხრივ:

"ერთ-ერთი, რაზეც ახლა ვმუშაობთ, ესაა გამოჯანმრთელებული ადამიანების პლაზმის გამოყენება. რამდენიმე ადამიანის პლაზმა, ვინც განაცხადა თანხმობა დონორობაზე, უკვე შეგროვილია. თუმცა, უნდა ითქვას, რომ ეს მხოლოდ სათქმელადაა იოლი, რომ გამოჯანმრთელებულის პლაზმა ავადმყოფს გადაესხას, თორემ ტექნოლოგიურად ეს ძალიან რთული და ფაქიზი საკითხია. პირველ რიგში, უნდა შეირჩეს ისეთი დონორი, რომელსაც მაღალი კონცენტრაციით აქვს დამცავი ანტისხეულები სისხლში, მეორე, ეს დონორი უნდა იყოს აბსოლუტურად ჯანმრთელი, მესამე, უნდა არსებობდეს სისხლის ჯგუფებს შორის შესაბამისობა. ძალიან ბევრი ფაქტორია, რაც ამ გადასხმის პროცესს ართულებს".

თენგიზ ცერცვაძის თქმით, საქართველოში 111 გამოჯანმრთელებულია და მათგან, მაქსიმუმ, 15 პროცენტის პლაზმა გამოდგება სამკურნალოდ:

"ეს მეთოდი გამოყენებული იქნება ერთეულ შემთხვევებში, როცა სხვა მედიკამენტი არაა ეფექტიანი".

ვირუსულ ინფექციასთან გასამკლავებლად პაციენტებს COVID-19-ისგან გამოჯანმრთელებული დონორი პაციენტების პლაზმა ჩინეთში გადაუსხეს, რომელიც SARS-COV-2 ვირუსის გამანეიტრალებელი ანტისხეულების მაღალ კონცენტრაციას შეიცავდა. მკურნალობის კურსი 10-მა პაციენტმა გაიარა, მათი ასაკი 34-დან 78 წლამდე მერყეობდა.

პლაზმური თერაპიის დაწყებიდან 3 დღის განმავლობაში, COVID-19-ისგან გამოჯანმრთელებული დონორების სისხლიდან აღებულმა პლაზმამ პაციენტებში კლინიკური სიმპტომები, მაღალი ტემპერატურა, ტკივილი გულ-მკერდის არეში და ხველება მნიშვნელოვნად შეამსუბუქა.

პლაზმის გადასხმიდან 7 დღის განმავლობაში პაციენტების ფილტვებზე არსებულმა დაზიანებებმა ზომაში დაპატარავება დაიწყო. 7 დღის შემდეგ კი ორგანიზმში ვირუსი აღარ ფიქსირდებოდა.