მიტანის სერვისის კურიერი რუსთავი 2-თან საუბარში ამბობს, რომ პარტია გირჩის მიერ ორგანიზებულ აქციაში არ მონაწილეობდა, მაგრამ იმ ადგილზე გაჩერების გამო დააკავეს და 3 000 ლარით დააჯარიმეს.

"შეკვეთა დავტოვე, ჩოჩქოლი დამხვდა და დამაინტერესა, გავაჩერე მოპედი და იქ დგომის გამო მომკიდეს ხელი. ჩამსვეს მანქანაში, არაფრად ჩააგდეს ჩემი განმარტება და გამომიწერეს 3 000 ლარიანი ჯარიმა. მე არ ვიღებდი მონაწილეობას აქციაში", — თქვა ზურაბ ქუტიძემ.

შინაგან საქმეთა სამინისტრომ დღეს, 23 აპრილს, გირჩის მიერ ორგანიზებულ აქციაზე 3 პირი დააკავა და 15 დააჯარიმა.დაჯარიმებულებს შორისაა გირჩის ლიდერი, ზურაბ ჯაფარიძე. როგორც უწყებაში განმარტავენ, აქციის მონაწილეები საგანგებო მდგომარეობის რეჟიმის დარღვევისთვის 3 000 ლარით დააჯარიმეს.

რაც შეეხება დაკავებულებს, სამინისტროს ცნობით, საქართველოს ადმინისტრაციული კოდექსის 166-ე და 173-ე მუხლებით დააკავეს, რაც წვრილმან ხულიგნობისა და სამართალდამცველების კანონიერი მოთხოვნისადმი დაუმორჩილებლობას გულისხმობს.

გირჩმა იპოდრომზე საგანგებო მდგომარეობის გაუქმების მოთხოვნით აქცია გამართა. იპოდრომზე შეკრებილები დისტანციის დაცვით სეირნობას აპირებდნენ, ზურაბ ჯაფარიძემ ასეც დააანონსა. თუმცა, შეკრებიდან მალევე ადგილზე პოლიცია გამოჩნდა, იქ მყოფი ადამიანები ჯერ დააჯარიმა, შემდეგ კი პოლიციაში გადაიყვანა. მათ შორის, ნაწილი ძალის გამოყენებით.