დღეს გირჩმა იპოდრომზე აქცია გამართა. პოლიტიკური პარტია საგანგებო მდგომარეობის გაუქმებას ითხოვდა. მათი თქმით, ადამიანებმა დაკარგეს შემოსავლები, ვეღარ იხდიან სესხებს და მათ არავინ ეუბნება "როდის შეიძლება დამთავრდეს ეს ჯოჯოხეთი".

აქცია იპოდრომზე დაიგეგმა და შეკრებილები დისტანციის დაცვით სეირნობას აპირებდნენ, ზურაბ ჯაფარიძემ ასეც დააანონსა. თუმცა, შეკრებიდან მალევე ადგილზე პოლიცია გამოჩნდა, იქ მყოფი ადამიანები ჯერ დააჯარიმა, შემდეგ კი პოლიციაში გადაიყვანა. მათ შორის, ნაწილი ძალის გამოყენებით.

On.ge-ს ფოტოები აქციიდან "სამკურნალო პროტესტი":

აქციის მონაწილეები ერთად

ფოტო: On.ge / თამუნა გეგიძე

პოლიცია ზურაბ ჯაფარიძეს 3 000-ლარიან ჯარიმას უწერს.

ფოტო: On.ge / თამუნა გეგიძე

გირჩის წარმომადგენელი, ვახტანგ მეგრელიშვილი პოლიციას ეუბნება, რომ Girchi.ge-ს ჟურნალისტია. ამის გადასამოწმებლად ის განყოფილებაში გადაიყვანეს.

ფოტო: On.ge / თამუნა გეგიძე

აქციის მონაწილეს აკავებენ

ფოტო: On.ge / თამუნა გეგიძე

განყოფილებაში გადაყვანილთა უმრავლესობას მიზეზი არ განუმარტეს. ამ მოქალაქეს კი უთხრეს, რომ ხულიგნობისა და პოლიციის მოთხოვნისადმი დაუმორჩილებლობის გამო აკავებენ.

ფოტო: On.ge / თამუნა გეგიძე

ამის შემდეგ, ძალის გამოყენებით დააკავეს იპოდრომზე მყოფი გოგო.

ფოტო: On.ge

მასთან ერთად მყოფი ადამიანი ამბობდა, რომ ისინი სასეირნოდ იყვნენ და არა აქციაზე. ისიც დააკავეს.

ფოტო: On.ge / თამუნა გეგიძე

მათი დაკავებისას ძალის გამოყენება On.ge-ს ვიდეოშიც ჩანს. კითხვაზე, რატომ იყენებენ ძალას, პოლიცია პასუხობს: "იმიტომ, რომ არ მემორჩილება!".

კიდევ ერთი დაკავებული. ამ დრომდე უცნობია, ჯამში რამდენი მოქალაქე დააკავეს იპოდრომზე და კონკრეტულად რას ედავებიან მათ.

ფოტო: On.ge / თამუნა გეგიძე

On.ge კითხვებზე პასუხების მისაღებად შინაგან საქმეთა სამინისტროს დაუკავშირდა, თუმცა უწყებაში ამ დრომდე არ ამბობენ, რატომ დააკავეს ეს ადამიანები. გირჩის ლიდერი, ზურაბ ჯაფარიძე აქციის დაანონსების დროს ამბობდა, რომ აქციის ორგანიზატორი თავადაა და მხოლოდ ის უნდა დაჯარიმდეს, სხვები კი იპოდრომზე დისტანციის დაცვით სასეირნოდ გამოვიდოდნენ.

რა ხდებოდა იპოდრომზე, ვიდეო აქციიდან:

საქართველოში 22 მაისამდე საგანგებო მდგომარეობაა, რომლის მიხედვით, შეკრებები და მანიფესტაციები იკრძალება. აკრძალულია ერთ სივრცეში სამ ადამიანზე მეტის შეკრებაც. თუმცა ამ და სხვა წესების დარღვევის საშუალება მიეცა მართლმადიდებელი ეკლესიის საპატრიარქოს — მათ სააღდგომო წირვა-ლოცვა თითქმის უცვლელი წესით ჩაატარეს და სხვა მოქალაქეებისგან განსხვავებით, ჰქონდათ მანქანებით გადაადგილებისა და 9 საათის შემდეგ შეკრების უფლება.