2019 წლის ბოლოს ვიქტორიას ჩანჩქერზე გადაღებულმა კადრებმა მსოფლიო შეაშფოთა. კლიმატის ცვლილებამ და გვალვამ ჩანჩქერის ნაწილი დააშრო, მისი ნაკადი კი 50%-ით შემცირდა.

თუმცა, როგორც უახლეს დრონით გადაღებულ ვიდეოში ჩანს, ზამბიისა და ზიმბაბვეს საზღვარზე მდებარე ვიქტორიის ჩანჩქერი აპრილში ისეთი უხვია, როგორიც ბოლო დეკადის განმავლობაში არ ყოფილა. როგორც AccuWeather-ის მთავარი მეტეოროლოგი ჯიმ ენდრიუსი ამბობს, ეს სეზონურობით აიხსნება.

2020 წლის 27 მარტის ჩანაწერით, ვიქტორიას ჩანჩქერზე წყლის ნაკადის მოცულობა წამში 3 890 კუბურ მეტრს შეადგენდა. წინა წლის იგივე დღეს კი ეს რიცხვი 800 კუბური მეტრი იყო, რამდენიმე წლის მონაცემის საშუალო კი 2 522 კუბურ მეტრს შეადგენს, რაც ნიშნავს, რომ წლევანდელი მაჩვენებელი საშუალოზე 54%-ით მეტია.

ადგილზე ყოველწლიურად უამრავი ტურისტი მიდის, რაც აფრიკის ორივე ქვეყნის ეკონომიკას ეხმარება, თუმცა კორონავირუსის პანდემიის დროს, ვიზიტორებისთვის მიმზიდველი ტერიტორია დაკეტილია, რაც იმას ნიშნავს, რომ მსურველებს ჩანჩქერის გაზრდილი დინების ნახვა მხოლოდ დრონით გადაღებული კადრებით შეუძლიათ.