ქართული ოცნების დეპუტატის, ირაკლი კობახიძის აზრით, მარნეულში აქცია ევროპულმა საქართველომ და ნაციონალურმა მოძრაობამ მოაწყვეს. დრეს, 22 აპრილს მარნეულის ერთ-ერთ სოფელში მოქალაქეები შეიკრიბნენ და სოფლის მეურნეობის პროდუქციის რეალიზებას ითხოვდნენ.

"ეს არის მიზანმიმართული ძალიან მძიმე აქტი. ეს დანაშაულია და უნდა გავაფრთხილოთ, რომ ცეცხლს არ უნდა ეთამაშებოდნენ", — განაცხადა კობახიძემ.

პარლამენტში აქციის შესახებ ისაუბრა დეპუტატმა გიგა ბოკერიამაც. მან მოუწოდა ევროპული საქართველოს ყველა მხარდამჭერს, რომ თავი შეეკავებინათ ისეთი ქმედებისგან, რომელმაც შესაძლოა სამართლებრივი წესრიგი დაარღვიოს.

სოფლის მეურნეობის პროდუქტების რეალიზების მოთხოვნით მარნეულის მუნიციპალიტეტის სოფელ შულავრში საპროტესტო აქცია გაიმართა. რამდენიმე სოფლიდან შეკრებილი მოსახლეობა ამბობს, რომ საგანგებო მდგომარეობის შეზღუდვების გამო პროდუქტის რეალიზების საშუალება არ აქვთ და ეკონომიკურად უჭირთ.

რადიო მარნეულის ინფორმაციით, მოქალაქეებმა პროტესტის ნიშნად ადგილზე სოფლის მეურნეობის პროდუქცია მიიტანეს და გზაზე დაყარეს. ისინი დახმარებას ადგილობრივი ხელისუფლებისგან ითხოვენ. აქციაზე ევროპული საქართველოსა და ნაციონალური მოძრაობის წარმომადგენლებიც არიან მისულები.

პროტესტის მონაწილეებთან ქვემო ქართლის გუბერნატორი შოთა რეხვიაშვილი და მარნეულის მერი ზაურ დარგალი მივიდნენ. შოთა რეხვიაშვილის თქმით, პროცესი პოლიტიკურად მართულია და ვისაც საუბარი სურს, ისინი ამისთვის მზად არიან.