დაავადებათა კონტროლის ცენტრის დირექტორის მოადგილე, პაატა იმნაძე ამბობს, რომ ცხოვრების ჩვეული წესის დაბრუნებას, ალბათ, ერთი წელი დასჭირდება. ამის შესახებ მან რუსთავი 2-ის ეთერში ისაუბრა.

"რაღაცები მოიხსნება, მაგრამ, რა თქმა უნდა, დარჩება გარკვეული შეზღუდვები და იმედი გვაქვს, რომ ეპიდემიოლოგიური სიტუაცია შესაძლებლობას მოგვცემს, რომ უფრო და უფრო მოიხსნას ეს შეზღუდვები. ეს ყველაფერი დამოკიდებული იქნება ჩვენზე, რამდენადაც ვისწავლით COVID-19-თან ერთად ცხოვრებას", — განაცხადა პაატა იმნაძემ.

კარანტინისა და სოციალური დისტანცირების ზომების ეფექტურობის შესახებ

ჟურნალ Science-ში გამოქვეყნებული ახალი კვლევის მიხედვით, სოციალური დისტანცირება, შესაძლოა, იმაზე დიდხანს გაგრძელდეს, ვიდრე გვგონია.

ჰარვარდის მკვლევართა გუნდმა რამდენიმე შესაძლო სცენარის კომპიუტერული მოდელი გააანალიზა და დაასკვნა, რომ აკრძალვების ზედმეტად სწრაფად ან ზედმეტად ადრე გაუქმებამ, შესაძლოა, პანდემიის პიკის შეფერხებას შეუშალოს ხელი, რაც თავის მხრივ ბევრად მძიმე შედეგებს გამოიწვევს.

ამავდროულად, დიდი დროის განმავლობაში მკაცრი სოციალური დისტანციის დაცვა შეძლება საზიანო იყოს. მკვლევართა თქმით, ისეთი მოდელის განხილვისას, რომელიც მკაცრ ზომებს მიმართავდა, სოციალური დისტანცირება იმდენად ეფექტური იყო, რომ მოსახლეობამ იმუნიტეტის გამომუშავება ვერ შეძლო.

"ყველა შესაძლო ვარიანტში, სადაც დისტანცირების ზომების შეჩერება მოხდა, ინფექციამ გამოცოცხლება დაიწყო", — ნათქვამია კვლევაში. ამ პრობლემის გამოსასწორებლად კი მკვლევრებმა ჩანაცვლებადი სოციალური დისტანცირება შემოგვთავაზეს, რომელსაც განსაზღვრული ინტერვალები ექნება.

გაიგეთ მეტი: სოციალური დისტანცირება, შესაძლოა, 2022 წლამდე გახდეს საჭირო