Facebook-მა სტარტაპი FacioMetrics შეიძინა, რომელიც სახის ამოცნობის ტექნოლოგიაზე მუშაობს. ამ კომპანიის შექმნილ აპლიკაციას ადამიანის სახეზე შვიდი ემოციის ამოცნობა შეუძლია.

როგორც Facebook-ის მიერ Techcrunch-ისთვის გაგზავნილ ბრიფშია ნათქვამი, აღნიშნული კომპანია მარკ ცუკერბერგის გუნდმა ხელოვნური ინტელექტის განვითარების პროექტებისთვის შეიძინა:

"მომავლის აპლიკაციები დაფუძნებული იქნება ჟესტებით მართვასა და სახის გამომეტყველების ამოცნობაზე."

რაც შეეხება ტექნოლოგიის ახლო მომავალში გამოყენებას, ფეისბუქი მას სახის ფილტრებისთვის გამოიყენებს. მაგალითად, ჰელოუინზე ფეისბუქის მომხმარებელს შეეძლო ფოტო ან ვიდეო გადაეღო და აპლიკაცია გამოსახულებას რომელიმე მონსტრის ფილტრს არგებდა. FacioMetrics სწორედ ამ გასართობი ფუნქციის გასაუმჯობესებლად იქნება გამოყენებული.

თუმცა არ არის გამორიცხული, მომავალში ფეისბუქმა მობილურ აპლიკაციაში პოსტების, ლინკებისა და კომენტარების დალაიქება ან სხვა ემოციების გამოყენება - "დაჰაჰავება", "დავოვება", "დალავება" და ა.შ. სწორედ FacioMetrics-ის ტექნოლოგიით დანერგოს.
გაგეღიმათ? ესე იგი, ფოტო მოგწონთ.