"ქართული მედია პლურალისტური, მაგრამ ჯერ არადამოუკიდებელია", — ამ შეფასებით საერთაშორისო ორგანიზაცია რეპორტიორები საზღვრებს გარეშე 2020 წლის პრესის თავისუფლების ინდექსს აქვეყნებს. ინდექსით, საქართველო 180 ქვეყანას შორის მე-60 ადგილზეა. ქვეყნის პოზიცია 2019 წელთან შედარებით არ შეცვლილა.

"ქართული მედია პლურალისტური, მაგრამ ისევ ძალიან პოლარიზებულია. ბოლო წლებში განხორციელებულმა რეფორმებმა დადებითად იმოქმედა მედიამფლობელების გამჭვირვალობასა და სატელიტური ტელევიზიის პლურალიზმზე, მაგრამ მედიამფლობელები ჯერ კიდევ ხშირად თავად განსაზღვრავენ სარედაქციო მასალას", — წერია ანგარიშში.

ქართული მედიის შეფასებაში, ასევე, საუბარია რუსთავი 2-ის საქმეზე სტრასბურგის სასამართლოს გადაწყვეტილებაზე, რომ მთავარი ოპოზიციური არხი წინა მფლობელს დაუბრუნდა, რის შედეგადაც "პროსამთავრობო სარედაქციო პოლიტიკა მიიღეს და ჟურნალისტთა უმეტესობამ არხი დატოვა". ამასთან, გაჩნდა ორი ოპოზიციურად განწყობილი ტელე არხი.

საუბარია, ასევე, აჭარის საზოგადოებრივ მაუწყებელზეც, რომ "კონკრეტული პარტიის მხარდაჭრისთვის არხმა განმეორებითი ზეწოლა განიცადა".

ანგარიიში წერია ისიც, რომ პოლიციის მხრიდან ჟურნალისტებზე ძალადობა ნაკლებად ხშირია, თუმცა მუქარის ფაქტები ისევ ხდება. საუბარია იმაზეც, რომ თბილისიდან გატაცებული აზერბაიჯანელი ჟურნალისტის, აფგან მუხტარლის საქმის გამოძიება ისევ ბუნდოვანია.