საპატრიარქოს საზოგადოებასთან ურთიერთობის სამსახურის უფროსი, ანდრია ჯაღმაიძე ექიმების მისამართით გამოთქმულ კრიტიკას ეხმაურება და ამბობს, რომ მათი განკითხვა ადამიანებს კორონასაგან ვერ დააზღვევს და სულიერ ზიანს მოუტანს.

მისი თქმით, ექიმები დაუმსახურებლად არ უნდა გაანაწყენონ, რადგან მათ კიდევ ბევრი შრომა მოუწევთ.

"აგორდა ექიმებისადმი უდიერი მიმართვები, არ გავანაწყენოთ ეს ადამიანები დაუმსახურებლად, კიდევ ბევრი აქვთ საშრომი. განკითხვაც ერთგვარი ვირუსია, კორონაზე არანაკლებ დამაზიანებელი. ექიმების განკითხვა, კორონასაგან ვერ დაგვაზღვევს და სულიერ ზიანს კი მოგვიტანს. ქრისტეს აღდგომის სიხარულს, მისგან მონიჭებულ სიყვარულს, თუკი მას მივიღებთ, შეუძლია განგვკურნოს ყველანაირი სულიერი კორონასაგან", — წერს ჯაღმაიძე.

სოციალურ ქსელებში ექიმებისადმი კრიტიკული პოსტები ვრცელდება. ერთ-ერთი ექიმი ვინც ბოლო დღეებში კრიტიკის ობიექტი გახდა, პირველი საუნივერსიტეტო კლინიკის დირექტორი, ლევან რატიანია.

ექიმების მიმართ კრიტიკას სასულიერო პირებიც გამოთქვამენ. მაგალითად, ბოდბელმა მთავარეპისკოპოსმა NCDC-ის ხელმძღვანელებს, ამირან გამყრელიძესა და პაატა იმნაძეს მოსახლეობის გაფრთხილების გამო ბოდიშის მოხდა მოსთხოვა. იაკობს მიაჩნია, რომ ადამიანებისათვის საკუთარი და სხვების ჯანმრთელობის მოფრთხილებისაკენ მოწოდება უღირსი საქციელია.