გირჩის წევრი ნინო დარსაველიძე ტელეკომპანია მაესტროს ეთერში კობა ნარჩემაშვილის გუშინდელ განცხადებას ეხმაურება და დასძენს, რომ, როდესაც შევარდნაძის მმართველობის პერიოდში ის შსს-ს ხელმძღვანელობდა, ამ დროს შინაგან საქმეთა სამინისტრო თავად იყო ნარკოტიკების გამსაღებელი:

"ქართული ოცნების დღევანდელმა დეპუტატმა, კობა ნარჩემაშვილმა, გუშინ განგვიცხადა, რომ არ არსებობს მხოლოდ მომხმარებელი, ყველა მომხმარებელი გამსაღებელია. შეიძლება ყველას არ ახსოვს, მაგრამ შევარდნაძის დროს, შინაგან საქმეთა სამინისტრო იყო ნარკოტიკული საშუალებების გამსაღებელი, ჰეროინის ძირითადად და ამავე დროს, განყოფილებიდან გამოსვლა შეიძლებოდა ძალიან მარტივად, 200-300 დოლარად.

ეს ახსოვს ყველა ჩემი თაობის და ჩემზე უფროსი თაობის ადამიანებს და ეს უნდა იცოდნენ ახალი თაობის ადამიანებმაც".

გუშინ, რეპორტიორის სტუდიაში ქართული ოცნების დეპუტატმა კობა ნარჩემაშვილმა განაცხადა, რომ, მსუბუქი ნარკოტიკების მოხმარება ნარკოტიკების უკანონო ბრუნვის ერთ-ერთი ნაწილია:

"პრაქტიკულად არ არსებობს ნარკოტიკების მხოლოდ მომხმარებელი, ნარკოტიკების მომხმარებელი ხშირ შემთხვევაში არის მისი გამსაღებელიც, რაც არ გულისხმობს მის მხოლოდ გაყიდვას, გადაცემას და გადაზიდვასაც გულისხმობს".

კობა ნარჩემაშვილი შინაგან საქმეთა სამინისტროს 2001-2003 წლებში, ედუარდ შევარდნაძის პრეზიდენტობის ბოლო პერიოდში, ხელმძღვანელობდა.