საგანგებო მდგომარეობის დროს გადაადგილებისთვის საჭირო საშვები საქართველოს ევანგელურ-ბაპტისტური ეკლესიის ღვთის მსახურებისთვისაც დაუშვეს. ამის შესახებ საქართველოს ევანგელურ-ბაპტისტური ეკლესიის ეპისკოპოსი რუსუდან გოცირეძე ფეისბუქზე წერს.

მისი თქმით, მას შემდეგ, რა მან ღიად გააპროტესტა ის ფაქტი, რომ საგანგებო მდგომარეობის პირობებში გადაადგილება მხოლოდ მართლმადიდებელი ეკლესიის მსახურებს შეეძლოთ, მას კორონავირუსთან დაკავშირებით შექმნილი საგანგებო შტაბიდან დაუკავშირდნენ.

"გუშინდელი ჩემი აღშფოთებული ვიდეოს, დასინული მესიჯის, უპასუხო ზარებისა და მეილების შედეგი წარმატებული აღმოჩნდა. სამართლიანობა მოითხოვს, რომ დავძინო ის ამბავი, რომ საგანგებო მდგომარეობის შტაბიდან ძალიან სასიამოვნო ახალგაზრდა ქალი დამეკონტაქტა, რომელმაც წვრილად ამიხსნა გადაადგილების საშვის პირობები და განაცხადის გაკეთების გზები. გავუგზავნე ღვთისმსახურთა სია და მონაცემები და ექვსი საათის შემდეგ იგივე თავაზიანი ახალგაზრდა დამიკავშირდა და დამიდასტურა ღვთისმსახურთა საშვებზე დადებითი პასუხი", — წერს გოცირიძე.