საქართველოს საგარეო საქმეთა სამინისტროს ინფორმაციით, კომპანია ჯორჯიან ეარვეისმა, რომელსაც უცხოეთიდან საქართველოს მოქალაქეები ჩამოჰყავს, უწყებას შეატყობინა, რომ ერთმა ადამიანმა რამდენიმე ბილეთის შესყიდვა სცადა. კომპანია ვარაუდობს, რომ ამის მიზანი ბილეთზე თანხის დამატებაა.

საეჭვო შესყიდვის მცდელობა 12 აპრილის ბერლინი-თბილისის რეისს ეხება.

"კომპანიის ვარაუდით, მოქალაქემ, რომელიც კომპანიის პირველადი მოკვლევის თანახმად, იმყოფებოდა საქართველოში, სცადა ერთდროულად რამდენიმე ბილეთის შესყიდვა, დიდი ალბათობით მომხმარებლისთვის დამატებითი გასამრჯელოს სანაცვლოდ მათი შემდგომი რეალიზაციის მიზნით", — ამბობენ სამინისტროში.

უწყებაში აღნიშნავენ, რომ ბილეთების გაყიდვა დადგენილ სამგზავრო ფასზე, 199 ევროზე მეტად დაუშვებელია.

"კომპანია ჯორჯიან ეარვეისის ინფორმაციით, მან მიმართა შესაბამის სამართალდამცავ ორგანოს გამოიკვლიოს აღნიშნული ფაქტი. როგორც კომპანიაში განმარტავენ, ერთი ადამიანის მიერ შესყიდული ბილეთის გადაყიდვა შეუძლებელია. კომპანია მზად არის ითანამშრომლოს სამართალდამცავ უწყებებთან შემთხვევის შემდგომი გამოძიების მიზნით", — ამბობენ საგარეო საქმეთა სამინისტროში.