დაავადებათა კონტროლის ცენტრის განცხადებით, კორონავირუსით ინფიცირებულ დედას ბავშვის ძუძუთი კვება შეუძლია, თუ შესაბამის წესებს დაიცავს. როგორც ცენტრი განმარტავს, ქალის რძე შეიცავს მნიშვნელოვან ანტისხეულებს და ისეთ ნივთიერებებს, რომლებიც იცავს ახალშობილს სხვადასხვა რესპირაციული ინფექციებისგან.

რა საფრთხეს უქმნის ძუძუთი კვება ახალშობილებს, თუ დედას აქვს COVID-19?

NCDC-ის ინფორმაციით, დღეისათვის, ვირუსი, რომელიც იწვევს COVID-19-ს, არ არის გამოვლენილი ქალის რძეში. თუმცა, რადგან დაავადება ახალია, ეს მტკიცებულებები ემყარება შეზღუდულ კვლევებს. მკვლევარები კვლავ აგრძელებენ ინფორმაციის მოძიებას იმის შესახებ, თუ როგორ ვრცელდება ვირუსი და რა რისკებს უქმნის ის ჩვილებს, რომელთა დედები არიან ინფიცირებული.

ამ დროისთვის არსებული კვლევების საფუძველზე დადგინდა, რომ იმ ქალების რძეში, რომლებსაც დაუდასტურდათ COVID ან/და სხვა კორონავირუსული ინფექცია, როგორიცაა მაგალითად, მწვავე რესპირაციული სინდრომი SARs-CoV, ვირუსი არ არის:

"ჩინეთში, უხანში ჩატარებულ კვლევაში, ექვსი პაციენტის, რომლებიც ორსულობის დროს დაინფიცირდნენ COVID-19-ით, რძის ნიმუშის (აღებული პირველი ლაქტაციის დროს) ტესტირების შედეგი ახალ კორონავირუსზე უარყოფითი იყო. თუმცა იმისათვის, რომ დავრწმუნდეთ ამ შედეგების სანდოობაში, საჭიროა გაცილებით მეტი ფართომასშტაბიანი კვლევის ჩატარება. ძირითადად, ვირუსის გადაცემის ყველაზე დიდი რისკი მოდის დაინფიცირებული დედის ზედა სასუნთქი გზებიდან. როგორც აქამდე მიღებული გამოცდილება გვიჩვენებს, დაავადება ახალშობილებსა და მცირეწლოვან ბავშვებში მძიმედ არ მიმდინარეობს".

როგორ უნდა ვმართოთ რისკი?

ჯანდაცვის მსოფლიო ორგანიზაციის ამჟამინდელი რეკომენდაციით, COVID-19-ით ინფიცირებულ ქალებს, სურვილის შემთხვევაში, შეუძლიათ ახალშობილების ძუძუთი კვება, მაგრამ მათ უნდა მიიღონ სიფრთხილის ზომები, მათ შორის:

  • ბავშვის კვების დროს, აუცილებელია პირის ღრუს და ცხვირის დაფარვა ნიღბით;
  • ხელების დაბანა საპნით და წყლით არანაკლებ 20 წამის განმავლობაში ბავშვთან შეხებამდე/კონტაქტამდე და მის შემდეგ;
  • მუდმივად გაწმენდა და დეზინფექცია იმ ზედაპირების, რომელთანაც ჰქონდათ შეხება

იმ შემთხვევაში, თუ დედა COVID-19-ით ინფიცირებულია, მას თავისუფლად შეუძლია მჭიდრო კონტაქტი იქონიოს ჩვილთან, აიყვანოს ხელში, აჭამოს, ჰქონდეს სხეულებრივი კონტაქტი, იცხოვროს მასთან ერთად ერთ ოთახში. ჯანმო დედებს ურჩევს ჩვილები ძუძუთი გამოკვებონ პირველი 6 თვის განმავლობაში. ხოლო შემდგომ ძუძუთი კვების პარალელურად ბავშვებს მისცენ ჯანსაღი საკვები 2 წლამდე.

როგორ უნდა მოვიქცეთ იმ შემთხვევაში, როდესაც დედა ძალიან ავადაა იმისთვის, რომ ჩვილი ძუძუთი გამოკვებოს?

თუ დედა COVID-19-ით მძიმედაა დაავადებული და უჭირს ძუძუთი კვება, უნდა გამოინახოს სხვა გზა. ჩვილს უნდა მიეწოდოს ხელოვნური საკვები ან დონორის რძე.