ნაციონალური მოძრაობის ლიდერი, ნიკა მელია ხელისუფლებას "ორმაგ სტანდარტში" ადანაშაულებს, როდესაც ჯარიმებს უწესებს მოქალაქეებს გარეთ გასვლაზე და ხალხმრავალ წირვებზე არ რეაგირებს. ნიკა მელია ფეისბუქის გვერდზე ფოტოს ავრცელებს, სადაც გამოსახულია ხალხმრავლობა ბზობის კურთხევისას:

"ასე აკურთხეს ბზა და ბზასთან ერთად ორმაგი სტანდარტი და უსამართლობა. აჯარიმებენ ცოლ-ქმარს, რომელიც გვერდიგვერდ სხედან, აჯარიმებენ იმიტომ რომ არ ემორჩილებიან აკრძალვას.

როდესაც ადამიანს კანონის დარღვევისთვის სჯი, აჯარიმებ სრულიად სამართლიანად და შემდეგ, უარესი დარღვევისთვის არ აჯარიმებ ვიღაც სხვებს, ის სრულიად სამართლიანი სასჯელიც მომენტალურად უსამართლო ხდება. რისთვის დავკეტეთ ბაზრები და რატომ დავტოვეთ ულუკმაპუროდ ამდენი ხალხი? რატომ გავაჩერეთ საზოგადოებრივი ტრანსპორტი? იმიტომ რომ ხალხმრავლობა აგვეცილებინა თავიდან. რატომ არ იღებს ხმას ხელისუფლება? ან ოპოზიცია (იშვიათი გამონაკლისების გარდა) რატომ არ ვიღებთ ხმას სახელმწიფოებრივი ინტერესების დასაცავად? [...] ჩვენ, ჩვენი დუმილით თანამონაწილე ვართ ხელისუფლების მიერ ორმაგი სტანდარტის დამკვიდრების...".

დღეს, 12 აპრილს, ბზობის წირვა მართლმადიდებლურ ეკლესიაში შეუფერხებლად ჩატარდა. საგანგებო მდგომარეობის აკრძალვების მიუხედავად, ბზებს მაინც კანონდარღვევით აკურთხებდნენ და ყიდნენ. ამავე დროს, ეკლესიებში ხალხმრავლობა იყო. სამების საკათედრო ტაძარში წირვას დაესწრო კათოლიკოს-პატრიარქი ილია მეორე.

დღესვე ცნობილი გახდა ისიც, რომ იერუსალიმიდან საქართველოში ცეცხლს აღდგომის ღამეს, 23:15 საათზე ჩამოიტანენ. საპატრიარქოს გეგმით ჩანს, რომ საგანგებო მდგომარეობის შეზღუდვებისა და ვირუსის გავრცელების რისკის მიუხედავად, ეკლესია ჩვეულ რეჟიმში აგრძელებს სააღდგომო მსახურებების ჩატარებას.

სამების საკათედრო ტაძარში, ბზობის წირვის დროს არქიდიაკონმა დემეტრემ მრევლს "ვნების შვიდეულის მსახურების" განრიგი გააცნო. აღდგომის წინა საღამოს, 22 საათზე, კომენდანტის საათის დაწყებიდან ზუსტად ერთი საათის შემდეგ, შუაღამის ჟამი იქნება, 23 საათზე კი ტაძარში კათოლიკოს-პატრიარქი მივა. 00:00 საათზე ლიტანიობა დაიწყება.

აღდგომის წირვაზე მრევლის დასწრების საკითხს საპატრიარქო ხელისუფლებასთან ერთად განიხილავს. შინაგან საქმეთა მინისტრის, ვახტანგ გომელაურის თქმით, შესაძლოა, საპატრიარქოსთან შეთანხმდნენ, რომ კომენდანტის საათის მიუხედავად, ღამის ლიტურგიაზე მისული მრევლი თუ ტაძრებიდან 6 საათამდე გარეთ არ გამოვა, კანონდარღვევად არ ჩაითვალოს. მისი თქმით, კანონს ყველაზე კარგად ეკლესიაში იცავენ.

ამასთან, ინფრასტრუქტურის მინისტრისა და ვიცე-პრემიერის, მაია ცქიტიშვილის განცხადებით, თუ მრევლი აღდგომას ეკლესიაში წავა, კომენდანტის საათი დაირღვევა. ის განმარტავს, რომ აკრძალულია 3 ადამიანზე მეტის შეკრება და 21:00 საათის შემდეგ გარეთ ყოფნა და თუ ეკლესიაში მასობრივი შეკრება იქნება, ეს ორივე პირობა დაირღვევა.

კორონავირუსის გამო საქართველოში საგანგებო მდგომარეობა 21 მარტს გამოცხადდა და ის 21 აპრილამდე გაგრძელდება. ხოლო, 30 მარტს პრემიერმა გიორგი გახარიამ "ფაქტობრივი კარანტინი" გამოაცხადა. მოქალაქეებისთვის 21:00 საათიდან დილის 06:00 საათამდე იკრძალება, როგორც ქვეითად, ისე ტრანსპორტით ქალაქებში და ქვეყნის მასშტაბით გადაადგილება. ცქიტიშვილის თქმით, შეზღუდვები ეხებათ სასულიერო პირებსაც, რომლებმაც მსახურება უნდა აღასრულონ.

საგანგებო მდგომარეობის დროს სრილად იკრძალება ნებისმიერი ტიპის საზოგადოებრივი ტრანსპორტით გადაადგილება, მათ შორის მეტროთი, როგორც ქალაქებსა და მუნიციპალიტეტებს შიგნით, ასევე ქალაქებს შორის. დასაშვებია მხოლოდ მსუბუქი ავტომობილებით, მათ შორის ტაქსით მგზავრობა მხოლოდ იმ შემთხევაში, თუ გათვალისწინებული იქნება ჯანდაცვის სამინისტროს რეკომენდაციები — მანქანაში იქნება მხოლოდ სამი ადამიანი და აქედან ორი აუცილებლად უკანა სავარძელზე.

საგანგებო მდგომარეობის რეჟიმის დარღვევისთვის, ფიზიკური პირი დაჯარიმდება 3 ათასი ლარის ოდენობით, ხოლო იურიდიული პირი 15 ათასით. განმეორებითი ქმედება გამოიწვევს სისხლის სამართლებრივ პასუხისმგებლობას 3 წლამდე თავისუფლების აღკვეთით.

გაიგეთ მეტი:

ბოლო მონაცემებით, საქართველოში კორონავირუსით ინფიცირება დაუდასტურდა 195 ადამიანს, მათგან 46 გამოჯანმრთელებული, 3 გარდაცვლილი. კარანტინის რეჟიმში 4 708 ადამინი რჩება, სტაციონარში მეთვალყურეობის ქვეშ — 370.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: