პრემიერ-მინისტრის პრესსპიკერის, ირაკლი ჩიქოვანის განცხადებით, ქობულეთის მუნიციპალიტეტის 4 ადმინისტრაციულ ერთეულში: გვარაში, მუხაესტატეში, ლეღვასა და წყავროკაში შემოდის მკაცრი საკარანტინო შეზღუდვები. მისივე თქმით, აჭარაში. კერძოდ ამ სოფლებში ინფიცირებულის კონტაქტების ფართო წრე დაფიქსირდა.

"გარდა იმ შეზღუდვებისა, რომელიც დადგენილია საგანგებო მდგომარეობით, ამ ადმინისტრაციულ ერთეულებში აკრძალულია შესვლა და გამოსვლა. ადგილზე ამ რეჟიმის აღსრულებას უზრუნველყოფს შსს და თავდაცვის ძალები. მოქალაქეებს სახლიდან გამოსვლა შეეძლებათ მხოლოდ მაშინ, როცა დასჭირდებათ საკვების ან სამედიცინო საშუალებების შეძენა, ასევე, ადგილობრივ მოსახლეობას ექნება საშუალება, განახორციელონ სასოფლო-სამეურნეო სამუშაოები, სპეციალური პროტოკოლის დაცვით", — განაცხადა ირაკლი ჩიქოვანმა მთავრობის ადმინისტრაციაში გამართულ ბრიფინგზე.

მანვე განაცხადა, რომ ჯანდაცვის სამსახურებმა უკვე დაიწყეს ყველა კონტაქტის მოძებნა, რომელიც ე.წ. ქობულეთის კლასტერს უკავშირდება. ასევე, ადგილობრივი ხელისუფლების წარმომადგენლებმა ადგილზე დაიწყეს თერმო-სკრინინგი.

საქართველოში კორონავირუსის კიდევ 10 ახალი შემთხვევა დადასტურდა და ინფიცირებულთა საერთო რიცხვი 252-მდე გაიზარდა. მონაცემები StopCov.ge-ზე 12 აპრილს განახლდა. ინფიცირებულთა შორის, გამოჯანმრთელებულია 63 ადამიანი და გარდაცვლილია 3 პაციენტი.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: