პირველი საუნივერსიტეტო კლინიკიდან კორონავირუსისგან გამოჯანმრთელებული ორი პაციენტი მარნეულიდან გაწერეს. კლინიკის დირექტორის, ლალი ტურძელაძის თქმით, გაწერილებს შორის არის 62 წლის მარნეულელი ქალი, რომლის გამოც მკაცრი კარანტინი გამოცხადდა მარნეულისა და ბოლნისის რაიონებში. ამის შესახებ მან TV პირველის ეთერში ისაუბრა:

"დადიოდა ლეგენდები, რომ იგი გარდაიცვალა, ძალიან დამძიმდა, რომ კვდება. ნამდვილად უმძიმესად იყო, მაგრამ დღეს ეს ქალი არის აბსოლუტურად ჯანმრთელი კორონავირუსისგან".

ლალი ტურძელაძემ აღნიშნა ისიც, რომ მეორე პაციენტი 55 წლისაა და მარნეულელი ქალის ოჯახის წევრია. მისივე ცნობით, მათ კლინიკაში მარნეულიდან კიდევ ერთი პაციენტი აგრძელებს მკურნალობას.

კლინიკის დირექტორის განცხადებით, მას შემდეგ, რაც გამოჯანმრთელებულ პაციენტებს მარნეულში გადაიყვანენ, 54 ინფიცირებული გააგრძელებს მკურნალობას. მათ შორის, 6 რეანიმაციაში, მძიმე მდგომარეობაშია.

საქართველოში კორონავირუსის დადასტურებულ შემთხვევათა რიცხვი უკვე 230-ია. დადასტურებულ შემთხვევებს შორის გამოჯანმრთელებულია 54 ადამიანი. ინფიცირებულებს შორის კი გარდაცვლილია 3 პირი. კარანტინის რეჟიმში 4 829 პირი რჩება, ხოლო, სტაციონარში მეთვალყურეობის ქვეშ 410 პაციენტია.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: