Bloomberg Billionaires Index-ის გამოთვლით, 10 აპრილის ვაჭრობის შედეგად ქართული ოცნების თავმჯდომარის, ბიძინა ივანიშვილის ქონება $25 მილიონით გაიზარდა და $5,15 მილიარდი გახდა. 8-9 აპრილს მისი ქონება $5,12 მილიარდი იყო.

ფოტო: Bloomberg

Bloomberg-ის ინდექსით, ბიძინა ივანიშვილის ქონების ზრდა აპრილიდან დაიწყო. მანამდე, პანდემიის ფონზე საფინანსო ბაზრებზე ფასების ვარდნის პარალელურად ბიძინა ივანიშვილის ქონება მცირდებოდა. 3 მარტს ივანიშვილის ქონება $200 მილიონით შემცირდა. 6 მარტის ვაჭრობის შემდეგ კი ხუთ დღეში მან $75 მილიონი დაკარგა. 13 მარტის ვაჭრობის შედეგად კი კიდევ $75 მილიონი დაკარგა.

ივანიშვილმა თავისი ქონების მნიშვნელოვანი წილი 2003-2006 წლების შუალედში, აქტივების მნიშვნელოვანი წილის გაყიდვის შემდეგ დააგროვა. ბიძინა ივანიშვილის ძირითადი ფინანსური საქმიანობა რუსეთთან არის დაკავშირებული. 1990-იანი წლებში ივანიშვილი აქტიურად მონაწილეობდა, რუსეთის საქმიან ცხოვრებაში. მისი ინტერესები ფართოდ იყო წარმოდგენილი რუსეთის ეკონომიკის სხვადასხვა სეგმენტში, მათ შორის, ფინანსების, ჯანდაცვისა და მძიმე მეტალურგიის სექტორში.