მთელი ეს კვირები შინ დავრჩით და დიდ-პატარასაც ერთმანეთისთვის მეტი დრო გამოგვიჩნდა. მივიხედ-მოვიხედეთ და დავრწმუნდით, რომ სტრესული ინფორმაციით დატენილი დღეები ყველაზე უკეთ წიგნის კითხვით შეიძლება გალიო, ახალი, დასამახსოვრებელი ამბები და პერსონაჟები გაიცნო.

ხუთი წიგნი შეგირჩიეთ. აქედან ორს მთელი მსოფლიო იცნობს, თაობებმა დაიმგზავრეს და შეიყვარეს. დანარჩენები ქართულ ენაზე შეიქმნა და მართალია მილიონობით მკითხველი არ ჰყავს, მაგრამ ბევრი მოზარდის და მისი მშობლის აუცილებელ საკითხავად იქცა.

მარკ ტვენის "ჰაკლბერი ფინის თავგადასავალი" მისისიპივით წყალუხვი წიგნია — ყველა ასაკის მკითხველს შეუძლია ჩაყვინთოს და ზედაპირზე თავისი სასურველი ამბავი ამოიტანოს. ტომ სოიერი რომ უფრო პოპულარულია ჩვენში, ამას თავისი, ხანგრძლივი ისტორია აქვს, მაგრამ ჰაკ ფინისთვის კვალში 7-8 წლიდან ჩადგომამ ბავშვის სამყაროს და ცნობიერების ჩამოყალიბებაში მნიშვნელოვანი როლი შეიძლება შეასრულოს. ამ ასაკის მოზარდები უკვე საფეხბურთო მატჩების ტრანსლაციებს ან ჩანაწერებსაც უყურებენ, ხიფათები, ბრძოლა და ათასგვარი ოინი მათთვის უცხო არაა, არც ის თემები, ძალადობა და რასიზმი რომ ჰქვია. ადამიანის არსებაში თავისუფალი და მაძიებელი სულის ჩასახვა/ამოძრავება ხომ სწორედ ბავშვობიდან, წრფელი და მოუთოკავი სურვილებიდან იწყება.

ანტუან დე სენტ ეგზიუპერის "პატარა უფლისწული" პირველივე სტრიქონიდან აღებს ყველა მოზარდის გულის კარს. ის თითქოს "სხვა პლანეტიდან" კი არ აღმოჩენილა ჩვენთან, არამედ სულ აქ იყო, ჩვენ გვერდით, ჩვენს გონებაში. მშობლებთან ერთად ამ წიგნის წაკითხვა უფროსებისთვისაც სასარგებლო იქნება და პატარებისთვისაც, "დიდებს ხომ არაფრის გაგება არ შეუძლიათ სხვების დაუხმარებლად. ბავშვისთვის კი ძალიან მომქანცველია ყოველთვის წინასწარ აუხსნას მათ ყველაფერი". მარადიული იდეალების — სიყვარულის, ჰუმანიზმის, მშვენიერების — შესახებ უბრალო ენით დაწერილ ამ იგავს ეგზიუპერი თავის საუკეთესო მეგობარს უძღვნის, ადამიანს, რომელსაც შია, სცივა და გამხნევება სჭირდება: "ლეონ ვერტს, როდესაც ის პატარა ბიჭი იყო".

ლევან ბოლქვაძის ზღაპარში მეფე ჩიგიდი გადაწყვეტს, უკვდავი იყოს და ამ მიზნის მისაღწევად ერთი შეხედვით ყველაზე მარტივ და მოულოდნელ გზას აირჩევს — დროს დაატუსაღებს. "დროზე დიდი დღესასწაული ამქვეყნად არ არსებობს. მეორე სასწაული კი ის არის, რომ ადამიანმა დროის აწყვა ისწავლა" – ამას მესაათე ბაზილიო ამბობს, მაგრამ მეფე ჩიგიდი არა მხოლოდ დროს, ბუნებასაც გამოუტანს განაჩენს, მის დამორჩილებასაც შეეცდება: შუა ზაფხულში თოვლიან ამინდებს გამოაცხადებს და უცებ გაზაფხულის ჩახჩახა მზით განათებულ ქუჩებში თბილად, ქურქებში გამოწყობილი ხალხი გამოჩნდება, გოგო-ბიჭები სიცილ-კისკისით მოედებიან ქუჩებს, ციგურებით "სრიალებენ", "გუნდაობენ". ერთ დღესაც, სასახლეში, სადაც მეფის არისტოკრატი ქვეშევრდომები წარბშეუხრელად ამტკიცებენ, მიხაკს ნივრის სუნი აქვსო, ჭაბუკა გამოჩნდება და ყველაფერს "თავდაყირა დააყენებს": საშაქარლამოში ბისკვიტი, რომელიც დიდი ხანია ჯიუტად არ ამოდის, ამოვა და ტორტი გამოცხვება; დამჭკნარი ყვავილები, როგორც კი ჭაბუკას ხელი შეეხებათ, გამოცოცხლდებიან და გაიხარებენ... ცხადია, ეს სიურპრიზი მეფე ჩიგიდისთვის სასიამოვნო არ უნდა იყოს — მთავარი ამბავიც აქედან იწყება...

"დათუნია დრუნჩა" სამი ქართველი ავტორის – ესმა ონიანის, ოთარ ჭილაძისა და გივი ჭიჭინაძის საბავშვო ლექსებს აერთიანებს. წიგნი ისეა შედგენილი, რომ მისი პერსონაჟების მეშვეობით ბავშვი სხვადასხვა გარემოში ხვდება: დღეობაზე, შეჯიბრზე, ზოოპარკში, საახალწლო სამზადისზე, თამაშ-თამაშით სწავლობს ანბანს, ციფრებს, ანგარიშს, მუსიკალურ ნოტებს, წერილს წერს მონატრებულ მეგობარს. და მის გვერდით ამ დროს შინაური თუ გარეული ცხოველები (ფრინველები, მწერები) არიან: ციყვი ცირა, ღრუტუნია, კენგურუ ენგურო, გამრჯე ბაჭია, სამი კნუტი — ცეტა, ზანტა, ბუტია, და რა თქმა უნდა თავად — ლეგენდარული დათუნია დრუნჩა.

ირმა მალაციძე თანამედროვე საბავშვო ავტორია. მისი თერაპიული ზღაპრები იმ შიშებსა და პრობლემებზეა, რაც ბავშვებს ხშირად აწუხებთ. ჟირაფი მარტოსულად გრძნობს თავს, რადგან უჩვეულო აღნაგობის გამო მინდორში გამოფენილ ტანმორჩილ ცხოველებთან თამაში უჭირს, მაგრამ ჩიტები, პეპლები და ფუტკრები ეცდებიან მასთან საერთო ენის გამონახვას. მათთვის, ვისაც სიბნელის ეშინია; მათთვის, ვინც ხშირად იმეორებს: "ეს მე არ შემიძლია"; მათთვის, ვინც ფიქრობს, რომ სხვებისგან განსხვავებულია და არასდროს ეყოლება მეგობრები; მათთვის, ვისაც ნემსის გაკეთების ეშინია; მათთვის, ვინც გამუდმებით რაღაცის ყიდვას ითხოვს; მათთვის, ვინც ხშირად იტყუება... — ამ სახალისოდ მოყოლილი ზღაპრების ქვესათაურებიც კი გვარწმუნებს, რომ ეს წიგნი აუცილებლად უნდა გვქონდეს.

კამპანია "კაცები ზრუნავენ" ხორციელდება გაეროს მოსახლეობის ფონდის (UNFPA) საქართველოს ოფისისა და არასამთავრობო ორგანიზაცია "Care Together"-ის მიერ, გაეროს ერთობლივი პროგრამის "გენდერული თანასწორობისათვის" ფარგლებში, შვედეთის მთავრობის ფინანსური მხარდაჭერით.