თბილისის სახელმწიფო უნივერსიტეტში აკადემიური საბჭოს არჩევნები 5 საათზე დასრულდა და შესაბამისად ყველა საარჩევნო უბანი დაიხურა. ცენტრალური საარჩევნო კომისიის თავჯდომარის, ლევან დვალიძის განმარტებით, 4 საათის მონაცემებით 7 საარჩევნო უბანზე რეგისტრირებული 791 ამომრჩევლიდან არჩევნებზე 666 გამოცხადდა:

"ეს ნიშნავს, რომ პროცენტული მაჩვენებელი 84,1-ია. თამამად შეგვიძლია ვთქვათ, რომ არჩევნები შედგა".

დვალიძის განმარტებით, არჩევნებმა მშვიდ გარემოში ჩაიარა და დარღვევებს ადგილი არ ჰქონია. რაც შეეხება მის შედეგებს, მისი ვარაუდით, ის დაახლოებით 2 საათში გახდება ცნობილი:

"პროცედურების მიხედვით [არჩევნები] გამჭვირვალედ მიმდინარეობდა. არანაირ ექსცესს ადგილი არ ჰქონია".

აკადემიური საბჭოს არჩევნები თსუ-ში. 11 მაისი, 2016.

ფოტო: ნინა კოპალეიშვილი / On.ge

თბილისის სახელმწიფო უნივერსიტეტში აკადემიური საბჭოს პირველი ეტაპის არჩევნები დღეს, 11 მაისს, 10 საათზე დაიწყო და 7 საათის განმავლობაში მიმდინარეობდა. არჩევნებში 33 კანდიდატმა მიიღო მონაწილეობა. დღის ბოლოს კი გაირკვევა იმ 14 პირის ვინაობა, რომლებიც აკადემიურ საბჭოს დააკომპლექტებენ.

როგორც რექტორის მოვალეობის შემსრულებელმა, დარეჯან თვალთვაძემ განმარტა, დღეს გამართული არჩევნები აკადემიური საბჭოს არჩევის პირველი ეტაპია, რადგან მოგვიანებით, როდესაც თსუ-ს პროფესორთა საინიციატივო ჯგუფის მიერ შემუშავებულ ცვლილებათა პაკეტს სენატი დაამტკიცებს, საბჭოს შემადგენლობა კიდევ გაფართოვდება:

"წესდებაში შევა ცვლილება, რომელზეც მუშაობა უკვე მიმდინარეობს და შესაძლებელი გახდება აკადემიურ საბჭოში ახალი წევრების არჩევა, დამატებით ფაკულტეტის წარმომადგენლების, ასევე უნივერსიტეტთან შემოერთებული სამეცნიერო კვლევითი ინსტიტუტების წარმომადგენლების. აკადემიური საბჭოს გაფართოებული არჩევნების დასრულება 1 ივნისამდე გვაქვს დაგეგმილი, უფრო კონკრეტულად, როდის ჩატარდება, ცნობილი მას შემდეგ გახდება, რაც წესდებაში ცვლილებები შევა".

თვალთვაძის თქმით, წესდებაში ცვლილებების შეტანის შემდეგ, სენატის გადაწყვეტილების შესაბამისად, აკადემიური საბჭოს საბოლოოდ ან 38, ან 45 წევრით დაკომპლექტდება:

"შესაბამისად, კანონის მიხედვით, მინიმუმ უნდა გაორმაგდეს სენატის შემადგენლობაც".