2017 წლის 20 იანვარს ამერიკის ახალი პრეზიდენტის ინაუგურაცია შედგება, რაც იმას ნიშნავს, რომ დონალდ ტრამპი ოფიციალურად შეუდგება მოვალეობის შესრულებას და აშშ-ს ახალი პირველი ლედი, მელანია ტრამპი ეყოლება.

წარმოშობით სლოვენიელი მელანია კნაუსი იუგოსლავიაში დაიბადა და 16 წლიდან აქტიურად ჩაერთო სამოდელო საქმიანობაში. ის არაერთხელ გამოჩნდა ისეთი ჟურნალების გარეკანზე, როგორებიცაა Vogue, Harper’s Bazaar და Vanity Fair.

მომავალმა მეუღლეებმა ერთმანეთი ნიუ-იორკში, ერთ-ერთ წვეულებაზე გაიცნეს, სადაც დონალდ ტრამპი მეგობარ ქალთან ერთად მივიდა. იმის მიუხედავად, რომ წვეულებაზე მარტო არ გამოცხადებულა, დონალდმა მელანიას ნომერი სთხოვა, რაზეც უარი მიიღო. ამის შემდეგ მიზნის მისაღწევად ტრამპმა სამსახურეობრივი მდგომარეობა გამოიყენა: ბიზნესმენი ცნობილია მოდური გამოცემებისა და სილამაზის კონკურსების მფარველობით. მას საკუთარი სილამაზის კონკურსიც აქვს, მის სამყარო, რითაც საბოლოოდ მელანიას ყურადღებაც მიიპყრო. რამდენიმე თვის შემდეგ მათ შორის რომანტიკული ურთიერთობა დაიწყო.

მელანიას განსაკუთრებული პოპულარობა მოუტანა ჟურნალმა GQ, რომლისთვისაც შიშველ ფოტოსესიაში მიიღო მონაწილეობა.

ტრამპი და კნაუსი 2005 წელს დაქორწინდნენ. ქორწილს ჰილარი კლინტონიც ესწრებოდა.

მელანიას ქორწილში დიორის $100 000-იანი კაბა ეცვა.

2006 წელს წყვილს ვაჟი, ბარონ უილიამ ტრამპი შეეძინა, რომელიც დონალდ ტრამპისთვის მეხუთე შვილია. ქორწილის შემდეგ მელანიამ ცხოვრების სტილი შეიცვალა, ისევე, როგორც გვარი.

ის თითქმის ყოველდღიურად ჩნდებოდა სხვადასხვა წვეულებებსა და ღონისძიებებზე და მალევე მოიპოვა პოპულარობა მედიაში. 2010 წელს მელანიამ საკუთარი საიუველირეო ბრენდი შექმნა. პირველ ლედის უყვარს ფრენა პირადი თვითმფრინავით, იტაცებს მაღალი მოდა და დასვენება ზღვის სანაპიროზე.

ყოფილი მოდელი ამჟამად აქტიურადაა ჩართული საქველმოქმედო საქმიანობაში, 2005 წელს ის აშშ-ის წითელი ჯვრის საზოგადოების კეთილი ნების ელჩი გახდა.

მელანია პენსილვანიაში სიტყვით გამოსვლის დროს ქვეყნის მოსახლეობას დაჰპირდა, რომ დონალდის პრეზიდენტად არჩევის შემთხვევაში თავს ბავშვთა უფლებების დაცვას მიუძღვნიდა. მისი თქმით, სოციალურ ქსელებში ბავშვებისა და მოზარდების თანატოლების თავდასხმებისგან დაცვა მისი მოღვაწეობის უმთავრესი პრიორიტეტი იქნება. მან ასევე დადო პირობა, რომ იბრძოლებს ქალთა უფლებებისთვისაც.

მელანია ტრამპი მშობლიური სლოვენიურის გარდა ხუთ ენაზე საუბრობს. მან იცის სერბული, ინგლისური, ფრანგული, იტალიური და გერმანული.

ამერიკის საპრეზიდენტო არჩევნებისთვის რესპუბლიკელების კანდიდატის დონალდ ტრამპის ყრილობაზე მელანია ტრამპის სიტყვით გამოსვლას დიდი ხმაური მოჰყვა. საზოგადოების ნაწილი მას მიშელ ობამას 2008 წლის სიტყვიდან ფრაზების მოპარვაში ადანაშაულებდა.
მოგვიანებით მისმა "სფიჩრაიტერმა" შეცდომა საკუთარ თავზე აიღო და განაცხადა, რომ ინსპირაციისთვის გამოიყენა იმ ადამიანების შეხედულებები, ვისითაც მელანია აღფრთოვანებული იყო. ამ ადამიანების რიცხვში მიშელ ობამაც მოხვდა.

სულ მალე მელანიას საქმეების მართვა თეთრი სახლიდან მოუწევს. წინა პირველი ლედისგან მას მოსამსახურეების მთელი არმია დახვდება, მათ შორის შეფმზარეული, ფლორისტი, პირადი მდივნები და ა.შ. საინტერესოა, გაართმევს თუ არა ქალბატონი ისეთ რთულ საქმეს თავს, როგორიც ამერიკის პირველი ლედის სტატუსია, მით უმეტეს, ასეთი ღირსეული წინამორბედის შემდეგ.